Ағайынды Царнаевтар Бостонда жасаған терактты тергеу барысында сотталған қазақстандық Диас Қадырбаев мерзімінен бұрын бостандыққа шығады, деп хабарлайды ҚазАқпарат ҚР Сыртқы істер министрлігіне сілтеме жасап.
Қазіргі таңда Диас Қадырбаев АҚШ-тың Техас штатындағы «Big Spring» федералды түрмесінде жазасын өтеп жатыр.
«Жуық арада біздің отандасымыздың бостандыққа шығатынын қуана хабарлаймыз. Бұдан кейін елден шығарылу үшін ол АҚШ-тың көші-қон қызметіне (визасының мерзімі өтуіне байланысты) тапсырылады. Жақсы тәртібіне байланысты отандасымыз толық мерзімі өтпей тұрып босатылады. Алдын ала мәлімет бойынша, Д.Қадырбаев 2018 жылдың 23 шілдесінде босатылады», – делінген ҚР СІМ хабарламасында.
«АҚШ-тағы Қазақстан Елшілігінің қызметкерлері Диас Қадырбаевтың жағдайын осы жылдың маусым айының алғашқы жартысында біліп қайтады. Елшіліктегі қызметкерлер отандасымыздың әкесі Мұрат Қадырбаевпен үнемі байланыста», – делінген хабарламада.
Айта кетсек, қазақстандық Диас Қадырбаев 2015 жылдың маусым айында 6 жылға сотталып кеткен болатын. Ол 2013 жылдың сәуірінде АҚШ-та ағайынды Царнаевтар жасаған терактқа қатысты іске іліккен еді.