Қазақстанда тұрмыстық зорлық-зомбылық жасағандар бұдан-былай қылмыстық емес, әкімшілік жауапкершілікке тартылатын болады.
3 шілде күні ҚР Президенті ҚР Қылмыстық кодексінің 108 және 109-баптарын («Денсаулыққа қасақана жеңіл зақым келтіру» және «Ұрып-соғу») Қылмыстық кодекстен Әкімшілік кодекске ауыстыру туралы заңға қол қойды. 13 шілде күні бұл түзетулер өз күшіне енді.
Бұған дейін Қылмыстық кодексте тұрмыстық зорлық-зомбылық үшін 45-тен 60 тәулікке дейін қамауға алу қарастырылған еді. Бірақ, бұл шараларды қолдану 2020 жылға дейін тоқтатылды. Енді Әкімшілік кодекс бойынша, әйелін ұрған ер адам ең кемі 15 тәулікке қамалуы мүмкін. Бірақ, ұрып-соғу мен денсаулыққа зақым келтіру үшін тағайындалатын айыппұлдар көлемі азайды. Сондай-ақ салыстырып қарар болсақ, Қылмыстық кодексте денсаулыққа зақым келтіргені үшін: 200 айлық есептік көрсеткішке (525 мың теңге) дейін айыппұл салу; осы көлемде түзеу жұмыстарына тарту; 180 сағатқа дейінгі мерзімге қоғамдық жұмыстарға тарту; 60 тәулікке дейін қамауға алу (тұтқынға алу шарасы ҚР ҚК 467-бабымен 2020 жылға дейін тоқтатылды) жазалары қарастырылған еді. Ал Әкімшілік кодекстегі тұрмыстық зорлық-зомбылық бабында 15 АЕК көлемінде айыппұл (39 мың теңге) немесе 15 күнге дейін әкімшілік тұтқындау қарастырылған. Сондай-ақ, Әкімшілік кодекс бабының екінші бөлімінде ұрып-соғуды бір жыл ішінде бірнеше рет қайталаған адамды 20 күнге әкімшілік тұтқынға алу көзделген және 30 АЕК (78 мың теңге) көлемінде айыппұл тағайындалады. Сонымен қатар, «Ұрып-соғу» бабы бойынша Қылмыстық кодексте 100 айлық есептік көрсеткішке дейінгі мөлшерде айыппұл салу немесе сол мөлшерде түзеу жұмыстары немесе 120 сағатқа дейінгі мерзімге қоғамдық жұмыстарға тарту немесе 45 тәулікке дейінгі мерзімге қамауға алу жазалары көрсетілген.