18+
Нұр-Сұлтан
Қазір
27
Ертең
27
USD
383.43
+0.14
EUR
432.47
+1.04
RUB
6.12
+0.04

Аида Балаева көпбалалы отбасыларға 21 мың теңге қалай төленетінін түсіндірді

Аида Балаева Фейсбуктегі парақшасында «Нұр Отан» партиясының саяси кеңесіне сайланғанын айтып, жәрдемақылардың қалай жүргізілетінін түсіндірді.

inform.kz

ҚР Президенті Әкімшілігі ішкі саясат бөлімінің меңгерушісі Аида Балаева кешегі өткен съезде жаңа әлеуметтік доктрина ұсынылды деп есептейді.

Оның атап өтуінше, Мемлекет басшысының тапсырмасына сәйкес, ағымдағы жылдың бірінші шілдесінен бюджет саласының ең төмен жалақы алатын қызметкерлерінің айлығы 30 пайызға (санитар жұмысшылар, мейірбикелер, техникалық жұмысшылар және т.б.); атқарушы органдардың азаматтармен тікелей жұмыс істейтін төменгі сатыдағы қызметкерлерінің жалақысы орташа есеппен 25 пайызға көтерілетін болады.

«Көпшілік үшін төлем тәртібі қалай айқындалатындығы түсінікісіз. Түсіндіруге тырысып көрейін. Қазіргі уақытта атаулы әлеуметтік көмек жан басына шаққандағы табысы бекітілген кедейшілік шегінен — 14,8 мың теңгеден немесе күнкөріс минимумының 50 пайызынан төмен азаматтарға көрсетіледі. Мемлекет басшысының тапсырмасына сәйкес, кедейшілік шегі күнкөріс минимумының 70 пайызына дейін көтерілді және 20 800 теңгені құрайды.

Бұл атаулы әлеуметтік көмек алушылардың әрбір баласына 20 800 теңге аударылады дегенді білдіреді. Бүгінгі күні 4 және одан да көп баланы тәрбиелеп отырған отбасы көпбалалы саналады.

Егер көпбалалы отбасыда 4 бала болса, онда жәрдемақының жалпы сомасы 83 мың теңге болады. Ал егер анасы үйде отырса, онда оның атаулы әлеуметтік көмегі қосылады. Мұндай отбасының жалпы табысы шамамен 103 мың теңге болады», — деді Аида Балаева.

Сонымен қатар ол мүгедек бала тәрбиелеп отырған ата-аналарға, қамқоршылар мен отбасыларға жәрдемақы 30 пайызға көтерілетіндігін атап өтті.

«Аз қамтылған отбасыларға арналған арнайы 40 мың жалдамалы пәтер құрылысына қатысты бастама да қатты қуантты. Бұған қоса, тұрғынүйқұрылысжинақ жүйесі арқылы жылдық 2-3 пайызбен тұрғын үй заемдерін берудің жеңілдетілген тетігі әзірленетін болады. Бұл аз қамтылған отбасыларды баспанамен қамтамасыз етуде проблемасын шешудегі маңызды қадам деп санаймын. Бұл жұмысқа өмір сапасының жаңа стандарттары жалдамалы баспана салу, заманауи жергілікті жолдар желісін дамыту, газ тарту, ауыз суға қолжетімділік сынды жаңа стандарттарды енгізе отырып, барлық өңір жұмылады», — деді ол.

Бөлім басшысының атап өтуінше, егер бұрындары автобандар мен республикалық маңызы бар жолдардың құрылысына назар аударылса, ендгі уақытта облысаралық және аудандық деңгейдегі автомобиль жолдарының желісі қарқынды дамытылады. Бұл облысішілік көлік қатынасының деңгейін жақсартып, азаматтардың күнделікті сапарларын жайлы қылады.

«Қорытындысында бұл өңірлердің экономикасына да, дамуына да септігін тигізеді. Бүгін айтылған барлық бастамалар қазақстандықтардың әл-ауқатының артуына айтарлықтай үлес қосатындығына сенімім мол. Бұл ретте партия рөлі — халықпен тиімді өзара іс-қимылды қамтамасыз ету және Мемлекет басшысы жүктеген барлық міндеттердің жүзеге асырылуын мониторингілеу», — деді Аида Балаева.