Алматыда ер адам тұраққа таласып, көршісін пышақтап өлтірді

Алматыда көршілер арасында үй ауласындағы автотұраққа көлік қоюға байланысты жанжал шыққан.Жанжал төбелеске ұласқан. Қатысушылардың бірі көмекке ағасын шақырған. Алайда ол мәселені анықтап жатпай, көршісінің мойнына пышақ сұғып алған. Бұл туралы 365info.kz сайты КТК арнасына сілтеме жасап хабарлайды. 

Оқиға 4 қазан күні кешке болған. Туыстарының айтуынша, Данил ұлы мен достарымен бірге қала сыртына демалуға кеткен. Үйіне оралғанда, автотұрақтағы бейтаныс көлікті көрген. Куәгерлердің айтуынша, ол көршісінен көлігін алып тастауды сұраған. Алайда бұл ер адамға ұнамай, арада жанжал туындаған. Кейін ол көмекке ағасын шақырған. Ағасы кенеттен пышақ алып шығып, Данилдың мойнына сұғып алған.

«Ол «сені кім ұрды» деп сұрады. Күйеуімді көрсетті. Ол жақындап келіп, күйеуіме соққы жасады. Басында басынан ұрды деп ойладым. Сосын күйеуімнің мойнын ұстап, аулаға қарай жүгіріп, жерге құлағанын көрдім. Ол қанға тұншыға бастады. Кейін оның тамағын кесіп жібергені белгілі болды», – дейді Данил Щетниковтың жесірі Ирина.

Щетниковтар отбасының үйіне таңертеңнен бастап 37 жастағы Данилмен қоштасу үшін туыстары, достары мен әріптестері келіп жатыр. Бұл күн әсіресе марқұмның жесірі үшін ауыр. Ерлі-зайыпты 8 жастағы ұл тәрбиелеп отырған. Ал бір айдан кейін қызы дүниеге келуі керек еді. Марқұмның досы Әмір Мұқашевтың айтуынша, жанжал туындап, олар сөзге келіп, төбелесіп қалған.

«Осыдан кейін ол осында қайта келіп, біреуге телефон шала бастады. Біз көліктен заттарды түсіріп жатқанбыз. Сол кезде бір топ жігіт келді. Ол сөзге келместен «Сен менің бауырымды ұрдың ба?» деп Данилдың мойнына пышақ сұғып алды. Осыдан кейін Данил үйіне қарай жүгіріп, «жедел жәрдем шақырыңдар» деп айқайлады», – дейді Әмір Мұқашев.

Марқұмның туыстары мен достарының айтуынша, Данил көршісімен араласпаған, бұған дейін олардың арасында ешқандай жанжал болмаған. Белгілі болғандай, күдіктінің отбасы көрші үйдегі пәтерді жалдап тұрған. Алайда оқиғадан кейін олар асығыс көшіп кеткен.