Ақтөбеде дүлей дауыл тұрғындарды әбігерге салды

«Барлығы өте жылдам болды. Аспан кенеттен түнеріп, қатты жел соқты. Не болып жатқанын түсінбей қалдық. Төтенше жағдай жөнінде ешқандай хабарлама алмадық. Адамдар қауіптеніп, жан-жаққа жүгірді», – дейді Ақтөбе тұрғындарының бірі.

Табиғат құбылысы жарты сағатқа жетпейтін уақытқа созылғанымен, ондаған ағаштың құлауына себеп болған. Сонымен қатар, тұрғындар бірнеше ауданда электр қуатының өшкенін хабарлады. Әсіресе, Алтын Орда шағынауданындағы кейбір көпқабатты үйлер жарықсыз қалған.

Өз кезегінде Ақтөбе облыстық төтенше жағдайлар департаменті ауа райының нашарлауы туралы ескерту сол күні таңертең жарияланғанын мәлімдеді.

Ведомство мәліметінше, 21 маусымда өңірдің батысы мен солтүстігінде жаңбыр мен найзағай күтілген. Сондай-ақ кей жерлерде желдің екпіні секундына 15-20 метрге дейін жетуі мүмкін екені ескертілген.