Енді Қазақстанда фильмдер прокатқа шықпас бұрын сараптамадан өтеді

Қазақстанда фильмдерді прокатқа шығару тәртібі жаңартылып, киноөнімдер үшін міндетті сараптама енгізілді.  Бұл талапты Мәдениет және ақпарат министрлігі бекітті. Жаңа талапқа сәйкес, фильмдер көрерменге ұсынылмас бұрын арнайы комиссияның қарауынан өтеді. Сарапшылар туындының мазмұнын қолданыстағы заңнама талаптарына сәйкестігі тұрғысынан бағалайды.

Сараптама барысында зорлық-зомбылықты насихаттау, әлеуметтік, ұлттық, нәсілдік, діни және өзге де алауыздықты қоздыру белгілері тексеріледі. Сонымен қатар порнографияны, педофилияны және дәстүрлі емес жыныстық қатынастарды насихаттайтын контентке де назар аударылады. Фильм авторлары немесе құқық иелері туындыны комиссия қарауына ұсынуы тиіс. Қарау нәтижесінде комиссия дауыс беру арқылы шешім қабылдап, сараптамалық қорытынды шығарады.