Алматыда онкологиямен өмір сүру мәдениетін өзгертуге бағытталған халықаралық «PRO ӨМІР» форумы өтеді

19 мамыр, 13:08

2026 жылы 21 мамырда Қазақстан Республикасы Ұлттық ғылым академиясының ғимаратында онкопациенттер мен дәрігерлерге арналған халықаралық «PRO ӨМІР» форумы өтеді. Бұл жай ғана медициналық конференция емес, емдеу процесінен гөрі адамның өзіне және оның толыққанды өмір сүру құқығына басымдық берілетін ашық диалог алаңы болмақ.

Неліктен бұл шара бүгінгі Қазақстан үшін маңызды?

Форумның өзектілігі қоғамдағы әлеуметтік сұраныс пен алаңдатарлық статистикаға байланысты:

Қазақстанда бүгінде шамамен 246 мың онкопациент есепте тұр, олардың 32 мыңнан астамы Алматыда тұрады;
Жыл сайын сырқаттанушылар саны 5–6%-ға артып келеді, ал күн сайын орта есеппен 113 адам өз диагнозын біледі;
Сонымен қатар пациенттердің 50%-ы диагноз қойылғаннан кейін 5 жыл және одан да көп өмір сүреді. Бұл оңалтуға, психологиялық қолдауға және қоғамға бейімделуге мұқтаж үлкен әлеуметтік топтың қалыптасып жатқанын көрсетеді.

«PRO ӨМІР форумы – бұл қолдау, түсіністік және диагноз қойылғаннан кейін де өмір жалғасатынына, оның толыққанды әрі сапалы болуы мүмкін екеніне сенім туралы», – дейді Kazakhstan Cancer Society президенті Диляра Радикқызы.

«Біздің форум ауру туралы емес. Ол “диагноз” деген сөзден кейінгі өмір туралы. Біз қорқыныштың орнын түсіністік басатын кеңістік қалыптастырғымыз келеді. Әр адам өзін жалғыз емес екенін сезініп, тек емделуді ғана емес, өмір сүруді де үйренсе дейміз», – дейді форум ұйымдастырушысы, prohealth.kz баспагері Адель Ануарбекова.

Халықаралық тәжірибе: өмір сапасына жаңа көзқарас

Форум Қазақстан, Ресей, Испания және Грузия елдерінің сарапшыларын біріктіреді. Бағдарлама дәрігер кабинеттерінде жиі айтылмайтын маңызды мәселелерді қамтитын бірнеше тақырыптық блокқа бөлінген. Сарапшылар пациенттердің қалыпты өмірге қайта бейімделу тәжірибесімен бөліседі:

Ашық медицина – онкологтармен заманауи емдеу әдістері туралы күрделі терминдерсіз ашық әңгіме;
Шынайы оқиғалар – пациенттердің диагноздан бастап қалпына келуге дейінгі тәжірибесі;
Ем кезінде және одан кейінгі өмір – тамақтану, физикалық белсенділік, репродуктивті денсаулық пен интимдік өмір туралы сараптамалық сессиялар;
Beauty & Care – терапия кезеңінде өзіне деген сенімділік пен сұлулықты сақтауға арналған психологтардың, стилисттер мен косметологтардың кеңестері.