Алматыда жаңа жылдық Президент шыршасы өтті
Алматыда «Жаңа жыл елімізді аралап келеді» атты дәстүрлі жаңа жылдық Президент шыршасы салтанатты түрде ұйымдастырылды. Мерекелік іс-шараға Алматы әкімі Дархан Сатыбалды қатысты.
Мерекеге 300 бала шақырылды. Олардың қатарында балалар үйінің тәрбиеленушілері мен ата-анасының қамқорлығынсыз қалған балалар, аз қамтылған және көпбалалы отбасылардан шыққан бүлдіршіндер, ерекше білім беру қажеттілігі бар балалар, сондай-ақ оқу, спорт және шығармашылық саласында жетістікке жеткен дарынды оқушылар бар.
Қазақстан Республикасының Президенті Қасым-Жомарт Тоқаевтың атынан Алматы әкімі Дархан Сатыбалды жас қонақтарды келе жатқан Жаңа жылмен құттықтап, зор денсаулық, бақ-береке, оқуда табыс және армандарының орындалуын тіледі.
Балалар үшін артистердің, шығармашылық ұжымдардың, ертегі кейіпкерлері мен аниматорлардың қатысуымен мазмұнды мерекелік бағдарлама ұйымдастырылды. Іс-шара соңында барлық қатысушыларға жаңа жылдық сыйлық табысталды.
Жаңа жылдық Президент шыршасы — жылдан жылға жалғасып келе жатқан игі дәстүр. Бұл мереке балаларға қуаныш сыйлап, олардың жан-жақты қолдау көріп жатқанын сезіндіруге, сондай-ақ өскелең ұрпаққа деген қамқорлық пен айрықша назардың маңызын айқындай түседі.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе