Қызылордада орталықтандырылған ыстық су жүйесін жүргізуге 5 млрд теңге бөлінді
Қызылорда – бүгінде орталықтандырылған ыстық сумен қамтылмаған еліміздегі жалғыз облыс орталығы. Қаланы ыстық сумен қамтамасыз ету мақсатында Үкімет резервінен 5 млрд теңге бөлінді. Тиісті қаулыға Премьер-министр Олжас Бектенов қол қойды.
Мемлекет басшысы Қасым-Жомарт Тоқаевтың тапсырмасына сәйкес, Қызылорда облысының бюджетіне ыстық су жүйелерінің құрылысына нысаналы трансферт ретінде шамамен 5 млрд теңге аударылды.
2023 жылдың 10 қазанында өңірге сапары барысында Президент Қасым-Жомарт Тоқаев Қызылорданы 2025 жылдың соңына дейін орталықтандырылған ыстық су жүйесіне қосуды тапсырған еді.
Жалпы құны 26,2 млрд теңгені құрайтын жоба екі кезеңмен жүзеге асырылады. 2024 жылы бірінші кезең аясында 187 үй орталықтандырылған жүйеге қосылады. Ал екінші кезеңде, яғни биыл, тағы 236 үй ыстық сумен қамтылады.
Бірінші кезең үшін Үкімет резервінен 11 млрд теңгеден астам қаражат бөлінген болатын. Қазіргі бөлінген 5 млрд теңге екінші кезеңнің алғашқы жұмыстарына бағытталады.
Жобаның нәтижесінде қаладағы 423 көпқабатты үй толықтай орталықтандырылған ыстық сумен қамтамасыз етіледі.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе