“Ойбай, сенбеңіздер!..”. БЖЗҚ қоры атынан жалған мәлімет тарауда
«БЖЗҚ» зейнетақы қоры атынан белгісіз тұлғалар телефон мен электрондық пошта арқылы жалған ақпарат таратып жатыр. Қор сыйлық ұтысы туралы хабарламаға азаматтардың алданып қалмауын ескертеді.
Бұл туралы «БЖЗҚ» зейнетақы қорының баспасөз қызметі хабарлады.
«Белгісіз біреулер сыйлықты алу үшін сілтемеде көрсетілген өзге ресурстарға кіріп, өзінің банк реквизиттерін жіберуді ұсынуда. Осылайша, зейнетақы қоры салымшыларының жеке деректерін заңсыз иелену әрекеті жасалуда», – делінген қордың баспасөз хабарламасында.
«Өздеріңіздің жеке мәліметтеріңіздің құпиялығын қамтамасыз ету үшін мұндай электрондық хабарламаларға, телефон қоңырауларына, СМС-хабарламаларға жауап бермеңіздер және электрондық жолдаудағы сілтемелерге кірмеңіздер. Олар ірі компаниялардың атын жамылып әрекет етеді.
Сыйлықтар мен ұтыстар туралы уәделерге сенбеңіздер. Бұл туралы жақындарыңыз бен таныстарыңызға ескертуді ұмытпаңыздар.
Мұндай қоңыраулар мен жолдаулар туралы міндетті түрде БЖЗҚ-ның 1418 байланыс орталығына хабарлаңыздар», – деп мәлім етті қордың баспасөз қызметінен.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе