Алматы облысының 42 жастағы тұрғыны анасын қатігездікпен ұрып тастаған. Егде жастағы әйелдің түрлі жарақат алып, миы шайқалған, деп хабарлайды өңірлік ІІД баспасөз қызметіне сілтеп Stan.kz.
Оқиға Райымбек ауданының Кеген ауылында орын алған.
Зардап шеккен әйел 18 желтоқсан күні дәрігерлердің көмегіне жүгініпті.
Ер адам тұтқындалып, аудандық полиция бөлімшесіне жеткізілді.
Қазіргі уақытта Райымбек ауданы бойынша АІІБ полицейлері қылмыстық тергеп-тексеру амалдарын жүргізіп жатыр. Тұтқындалған ер адамға қатысты келу туралы міндеттеме түрінде процессуалдық мәжбүрлеу шарасы қолданылды.
Полицейлер ер адамның мас күйінде өзінің егде жастағы анасын ұрып-соққанын анықтады. Ол ұрыс кезінде анасына көсеу лақтырған. Салдарынан әжейдің басы жарақаттанған.