Анкара Қырғызстанға жаңа форматтағы түрік лицейін ұсынды
Түркия Қырғызстанға “Маариф” білім қорымен әріптестік орнатуды ұсынды. Түрік премьер-министрі Биналь Йылдырым қырғыз парламенті спикері Чыныбай Тұрсынбековпен кездескенде осындай ұсыныс жасады.
Парламенттің баспасөз қызметінің хабарлауынша, Биналь Йылдырым қырғыз президенттік сайлауы сәтті өтсін деп тіледі. Оның айтуынша, өткен жылғы 15 шілдедегі Түркиядағы оқиғадан соң, Тұрсынбеков қырғыз жоғары басшылығынан алғаш мәрте Анкараға сапармен барды. “Бұл сапар біздің әріптестігімізге тың серпін береді деп үміттенемін”, – деді премьер.
Қырғызстанда 1992 жылдан бері жұмыс істейтін қырғыз-түрік “Себат” лицейі биыл наурызда “Сапат” деп өзгертілді. 2016 жылғы Түркиядағы әскери бүліктен соң, білім мекемелерінің оппозиционер Гүленге қатысы бар деген желеумен, түрік билігі бұл лицейлерді жабу мәселесін көтерді. Түркия билігі Гүленді бүлік ұйымдастырды деп айыптады.
Бұған дейін Қазақстандағы түрік лицейлерінің атауы өзгертілген еді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе