«ҚазАқпарат» халықаралық ақпарат агенттігі 29 қыркүйек күні өтетін Қазақстандағы маңызды оқиғаларға шолуды ұсынады.
Astana Leisure қазақстандық халықаралық туристік көрмесі аясында Маңғыстау облысының туризм басқармасы Астанада Mangystau Tourism Workshop – 2017 шарасын өткізеді. Оның барысында өңірдегі туризм индустриясындағы көшбасшы компаниялар турларды ұйымдастыру бойынша өздерінің ерекше қызметтерін таныстырады.
Сағат 10:00 кезінде елордадағы Astana Marriott Hotel-де Қазақстан Республикасы ІІМ, Беларусь Республикасы ТЖМ және Ресей ТЖМ Бірлескен алқасының V отырысы басталады. Отырысқа аталған ведомстволардың министрлері қатыспақ. Жиында халықты төтенше жағдайлардан қорғаудың өзекті мәселелері талқыға салынады.
Сағат 11:00-де Әділет министрлігінде мемлекеттік органдардың, үкіметтік емес сектор мен бизнес қоғамдастықтың қатысуымен Заң жобалау қызметі мәселелері жөніндегі ведомствоаралық комиссияның кезекті отырысы өтеді. Жиын барысында заң жобасының 2 тұжырымдамасын, 2018 жылға арналған Үкіметтің заң жобалау жоспарының жобасын қарастыру ескерілген.
Бұдан бөлек, сағат 12:20 кезінде Астанада Орталық коммуникациялар қызметінде Қазақстандағы электр энергетикасын дамытудың өзекті мәселелеріне арналған баспасөз мәслихаты өтеді. «KEGOC» АҚ Басқарма төрағасы Бақытжан Қажиев саланы дамытудың бағыттары мен энергетика алдында тұрған өзекті мәселелер жайында егжей-тегжейлі баяндап беретін болады.
29 қыркүйекте түстен кейін «Нұр Отан» партиясы Астана қалалық филиалы партиялық тыңдау өткізеді. Күнтәртібіне 2016-2020 жылдарға арналған елорданы дамытудың бағдарламасын жүзеге асыру аясында қаладағы көліктік кешенді жаңғырту тақырыбы шығарылып отыр. Партиялық тыңдау ҚР Ұлттық академиялық кітапханасында өтеді.
Сағат 15:00-де «Алатау» спорт кешені аумағында өзін-өзі қорғау мен жас ұрпақтық моральдық қасиеттерін нығайтуға арналған ашық шара ұйымдастырылады. Осы орайда шараға келгендер самбодан үздік мамандармен пікір алмаса алады, сонымен қатар өзін-өзі қорғаудың ерекше тәсілдерімен танысуға мүмкіндік жасалады.
29 қыркүйекте кешке қарай «Астана Опера» камералық залының сахнасында «Музыкалық дәуірлер диалогы» атты концерт басталады. Онда халықаралық конкурстардың лауреаты Ернар Нұртазин (фортепиано) өнер көрсететін болады. Бүгін «Ұлттық код және жаһандану дәуіріндегі сәйкестік» тақырыбында Қазақстан халқы Ассамблеясы ғылыми-сарапшылық кеңесінің отырысы өтеді. Шараны ҚХА, ҚР Президенті жанындағы «Қоғамдық келісім» РММ ұйымдастырып отыр. Форум Астанадағы Назарбаев Университетінде өткізіледі.