Омбы өңірінде «Омбы қазақтары» қоғамдық ұйымының атсалысуымен бірінші аймақтық «Супер келін» байқауы өтті, деп хабарлайды Baq.kz.
Омбы өңірінде «Омбы қазақтары» қоғамдық ұйымының атсалысуымен бірінші аймақтық «Супер келін» байқауы өтті, деп хабарлайды Baq.kz.
«Омбы қазақтары» қоғамдық ұйымының төрайымы Торғын Әшенованың айтуынша, байқауда бақ сынаған келіншектердің барлығы үздік атануға лайық.
«Ақтық сынға жолдама алғандардың барлығы – жас аналар. Арасында бес бала тәрбиелеп жатқан жандар да бар. Олардың қатарында жеңіл атлетикадан спорт шебері, қолөнер шеберлері, күміс көмей әншілер де болды. Ең бастысы, олар – қазақ халқының бетке ұстар келіндері, ошақтарының ұйытқысы, үлгі тұтар әйелдер. Біздің мақсатымыз қазақ қыздарының тек бала тәрбиесімен шектеліп қалмай, қоғамның дамуына сүбелі үлесін қосуға атсалысып жатқандарын дәлелдеу», – дейді Торғын Әшенова.
«Омбы қазақтары» ұйымы бұған дейін тұрмыс құрмаған аруларға арналған «Ару қыз» байқауын ұйымдастырған болатын. Сондықтан, келіндер қауымы бақ сынайтын шараны ұйымдастыру қолға алынған. «Супер келін» байқауын өткізуге осы жайт түрткі болыпты.
«Байқауда келіндеріне енелері де қолдау көрсетті. Конкурстың қорытынды кезеңінде келіндер шығармашылықтарын паш етті. Өнерлері арқылы қазақтың ұлттық дәстүрлерін білетінін паш етіп, ұлттық құндылықтарды кеңінен насихаттауға барын салды. Шара барысында, тіпті, қатысушылардың бірі енесімен татуласып, баршаға үлгі болды», – дейді Торғын Әшенова.
«Келіндік тәжірибем – 9 жыл. Фотоөнер, спорт және әнге деген ықыласым бөлек. Ас әзірлеуді жаным сүйеді. Ең бастысы, тұрмыс құрмаған қыздарға супер келін болудың қыр-сырымен бөліскім келді», – дейді Салия Днищева.
Омбы облысының супер келініне «Омбы қазақтары» ұйымының атынан ыдыс жуғыш машина сыйға тартылды.
Айте кетейік, қазіргі таңда Омбы облысында 80 мыңнан астам қандасымыз тұрады.