27 шілде – халықаралық адам саудасымен күрес күні қарсаңында БҰҰ бас ассамблеясының бастамашы болуымен, ІІД ұйымдасқан қылмыспен күрес басқармасы Көкшетау еріктілерімен бірлесе отырып, облыс орталығында үлкен профилактикалық шара өткізді. Бұл туралы Ақмола облыстық ІІД баспасөз қызметі хабарлайды.
Акция ұйымдастырушылары адам саудасы, еңбек және сексуалды құлдыққа қалай қарсы тұру керектігін үйрететін парақшалар мен ескертпелер таратқан. Шара Көкшетаудың орталық алаңы мен теміржол бекеті аумағында атқарылды.
Сондай-ақ, ұйымдасқан қылмыспен күрес басқармасының ақпараты бойынша, 6 ай ішінде облыс аумағында адам саудасына қатысты 17 дерек тіркелген. Оның ішінде “адам саудасы”, “кәмелетке толмағандарды жезөкшелікке мәжбүрлеу”, “кәмелетке толмағандарды саудалау” сынды айыптауға ұшырағандар бар.
5 шілде күні полицейлер жедел-іздестіру шаралары барысында 22 және 27 жастағы екі ер адамды қолға түсірді. Олар 2017 жылдың мамыр айынан бастап 17 жастағы алматылық қызды күштеп ұстап, интимді қызмет көрсетуге мәжбүр еткен.
Аталған деректер бойынша қылмыстық іс қозғалып, күдіктілер уақытша тергеу изоляторына қамалды.