Оңтүстік Қазақстан облысы еліміздің өңірлері арасынан бірінші болып Біріккен Араб Әмірлігіне ет экспорттауды бастады.
Таяуда Шымкент халықаралық әуежайынан 1 мың бас ұсақ мал Фуджейра (БАӘ) қаласына жеткізілді. Облыстық ауыл шаруашылығы басқармасының қолдауымен ұйымдастырылған жұмыстардың экспорттаушысы “Қайып ата” компаниясы болып табылды, деп хабарлайды ОҚО әкімінің баспасөз қызметі.
Келісімшарт аясында осы жылдың тамыз айына дейін жергілікті кәсіпкерлер БАӘ-не 60 мың бас ұсақ мал жеткізетін болады.
Сонымен қатар, осы бағыттағы келіссөздер Сауд Арабиясы, Иран және Ирак мемлекеттерімен жүргізілуде. Жыл соңына дейін 1,5 мың тонна етті экспортқа жөнелту жоспарланған.
Ет экспортын дамыту облыстың мал шаруашылығы саласына жаңа серпіліс беріп, ауылдың кәсібі мен нәсібін көбейтетіні анық. Бұл бағыттағы жүйелі мәселелерді шешу мақсатында ұсақ және ірі қара мал өсіру бойынша арнайы кооперация құрылатын болады.
Бұл бағыттағы жұмыстар жалғасын табады.