Ақтөбеде мейрам күндері ҚР Тұңғыш Президенті саябағында орын алған жол апатына қатысты толық мәлімет жарияланды.
Бұл туралы Ақтөбе облыстық ішкі істер департаментінің өкілдеріне сілтеме жасап, Zakon.kz хабарлады.
«7 шілде күні сағат 21.10 уақытында үш ай бұрын, яғни биылғы наурызда ғана жүргізуші куәлігін алған Ақтөбе тұрғыны Әбілқайыр хан көшесінің бойымен Suzuki Xi7 көлігін тізгіндеп келе жатып, жол ережелерінің 10.1 тармағын бұза отырып, қозғалысқа қауіп туып тұрса да, көлік өздігінен тоқтамағанынша оны тоқтатуға әрекет жасамаған. Осылайша ол сол маңда серуендеп жүрген екі адамды қағып кеткен. Оның бірі – 19 жастағы бойжеткен оқиға орнында көз жұмса, жанындағы жігіт ауруханаға түсті”, – деді полициядағылар.
Жол апаты салдарынан жүргізушінің өзі де ауруханадан бір-ақ шыққан.
Еске салсақ, кеше, 7-шілдеде Ақтөбеде ҚР Тұңғыш Президенті саябағы алдында демалып жүргендерге қарай көлік қойып кеткен. Салдарынан бір бойжеткен оқиға орнында көз жұмды. 4 адам зардап шегіп, түрлі жарақат алған. Көлік ішінде 3 адам болыпты.