Сотта куәгер Әблязов пен Тәтішевтің текетіресі туралы кеңінен айтып берді

Бұл туралы КТК телеарнасы хабарлады. Мәскеуде кездескен банкирлер жанжалдасып, келесі күні Тәтішевке оқ атылған. Дәл осы жағдайды және кейіннен “шыны королі” атанған Мұратхан Тоқмәдидің қаржылық қиындықта жүргенін сол кезде Әблязов ұтымды пайдаланған болуы мүмкін. Тіпті ол Тоқмәдиді “бұрынғы қылмыс әлеміндегі былықтарыңды әшкерелеймін” деп құзырлы органдарындағы таныстарын айтып қорқытқан делінеді. Сөйтіп, оны қармаққа ілген олигарх Әблязовтің “БТА” банкінің төрағасы Ержан Тәтішевті өлтірткені де айтылды.

4 миллион долларға тапсырыс алған Тоқмәди 13 жылдан соң осы қылмысын мойындап, 10,5 жылға түрмеге қамалған. Ал енді оған тапсырыс берген Әблязовтің мәселесі май-шаммен қаралып жатыр. Оның өзі сот отырысында жоқ.

Бүгін бас-аяғы 4 куәгерден жауап алынды. Келесі процестердің бірінде Ұлттық қауіпсіздік комитетінің экс-басшысы Нартай Дүтбаев пен киллерлік қызмет атқарған Мұратхан Тоқмәди де сотқа келеді деп күтіледі.