18 наурыз Ресей Федерациясында Президент сайлауы өтеді. Қазіргі мемлекет басшысы Владимир Путин үшінші рет бұл алып империяны басқаруға бел буып, бағын сынап көрмек.
Бұл туралы Baq.kz хабарлады.
Осыған байланысты, ВВС ақпарат агенттігі Путиннің алғашқы президенттік сайлауынан бастап, бүгінгі күнге дейінгі мансабын талдап шықты.
2018 жылы 18 наурызға жоспарланған президент сайлауына 8 кандидат қатыспақ, соның негізгісі – Владимир Путин. Бір қызығы, 8 кандидаттың ішінде Ксения Собчак та бар. Ол Путиннің ескі досы Анатолий Собчактың қызы.
Ксения жақында «Казинодағы сияқты, үнемі казиноның өзі жеңіске жетсе, Ресей демократиясында да тек Путиннің жеңері сөзсіз» деп сұхбат берді.
Ксения Собчак – бұрынғы реалити-шоу тележүргізушісі, 36 жасар оппозиционер-журналист. Ал нағыз оппозиционер кандидат Алексей Навальный сайлауға қатысу құқығын иелене алмады. Олар Ксенияны Путиннің ескі досы, тек сайлауға «шынайы» атмосфера сыйлау үшін жақсылап ойнап беретін Кремль қуыршағы деп баға берген.
Еске салайық, Анатолий Собчак Санкт-Петербург қаласының мэрі қызметін атқарған, ал Путин оның орынбасары болған. 1990 жылдары жемқорлыққа бой алдырды деп айыпталған сәтте, Путин Собчакты шетелге шығарып салып, құтқарып қалған. Алайда, алғаш рет Владимир Путин президенттікке сайланған соң, оның ескі досы Анатолий Собчак 62 жасында қонақ үйде қаза тапты.