Нұр-Сұлтан
Қазір
7
Ертең
6
USD
427
+1.34
EUR
497
-1.07
RUB
5.53
-0.03

Назарбаевтың батыл шешімі ел дамуына жол ашты – АҚШ-тың мемлекеттік хатшысы

Басқосуда БҰҰ Қауіпсіздік Кеңесінің қару-жарақтың таратылуын болдырмау туралы шешімдерін қолдану жолдары талқыланды, деп хабарлайды ҚР СІМ баспасөз қызметі.

АҚШ Мемлекеттік хатшысы Рекс Тиллерсон өзінің ауқымды баяндамасында жаһандық қарусыздану мен ядролық қаруды таратпау үдерісіндегі Қазақстанның рөліне бөлек назар аударды. Атап айтқанда, ол ядролық қарудан бас тартқан еліміз даналықтың айрықша үлгісі болып табылатынын атап өтті. Қазақстан бұрынғы кеңестік қаруларды және ядролық технологияларды өз аумағынан алып тастады және ядролық емес мемлекет ретінде Ядролық қаруды таратпау туралы шартқа қосылды.

«Қазақстан басшылығының батыл шешімі ядролық қарудың, оның құрамдас бөліктерінің, ядролық материалдардың және қос мақсатты технологиялардың зиянкестердің қолына түсу қаупін едәуір қысқартты», – деп атап өтті Рекс Тиллерсон.

Оның пікірінше, ядролық қару басқа елдермен қарым-қатынастарды қиындатып, есептен жаңылысу, апаттар немесе тарату қаупін тудырады. Мемлекеттік хатшы Қазақстанның әрекеті елді халықтар қауымдастығына тарту үдерісінде маңызды қадам болғандығына ерекше тоқталды.

«Ядролық қарудан бас тартқанының арқасында әлем Қазақстанды ядролық агрессорға айналуы мүмкін «аластатылған» мемлекет ретінде қарастырмайды. Ол өзінің ядролық көршілері – Ресей мен Қытайдың дұшпанына да айналған жоқ. Сондай-ақ бүгінде Қазақстан көршілерімен тату-тәтті өмір сүруде. Ол берік сауда қатынастарын дамытуда. Биыл ЭКСПО-2017 халықаралық мамандандырылған көрмесі өтіп, ол болашақтың энергия көздерін және бүкіл әлемнің қатысушыларына Қазақстанның инвестициялық мүмкіндіктерін көрсетті. Бұл – өңірлік және халықаралық бейбітшілік пен өркендеуге елеулі үлес қосып отырған заманауи мемлекет. Қазақстан өзінің шешімінен тек пайда көрді»,- деді ол.

«Бұрынғы кәсіби қызметімде Президент Нұрсұлтан Назарбаевпен бірнеше рет кездестім және оған осы шешім туралы сұрақ қоюыма мүмкіндік болды. Ол маған бұл шешімге ешқашан өкінбейтінін және күндердің бірінде бұл жоба жас еліміз үшін жасаған ең зор жақсылығы екенін айтқан болатын», – деп еске алды Рекс Тиллерсон.

ҚР Сыртқы істер министрі Қайрат Әбдірахманов өз сөзінде АҚШ Мемлекеттік хатшысына біздің елімізге және Президент Нұрсұлтан Назарбаевқа жолдаған жылы лебіздері үшін алғысын білдірді. Министр қатысушыларды АЭХА төмен байытылған уран банкінің ашылу кезінде жарияланған Елбасының бастамаларынан хабардар етті, сондай-ақ халықаралық қарусыздану және ядролық қаруды таратпаудың негізгі аспектілері бойынша Қазақстанның ұстанымына егжей-тегжейлі тоқталды.

Серіктестер жаңалықтары
Көп қаралған
© «365 Info», 2014–2020 info@365info.kz, +7 (727) 350-61-36
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе
Қате байқасаңыз, оны белгілеп Ctrl+Enter басыңыз