Танымал журналист Асхат Садырбай клипінің рейтингі Ninety One тобынан қалып қойғаны үшін өзін балағаттап тастаған әнші туралы ашық айтты. Оның көргенсіздігіне қатты наразы болған журналист оның бұл әрекетін жайып салмаққа бел буған.
Бұл туралы NUR.KZ хабарлайды.
Бұл туралы Асхат Садырбай өзінің Instagram парақшасында арнайы жазба қалдырды.
Жазбасында ол өзін балағаттаған әншінің көргенсіздігі мен тексіздігі туралы айтып, Ninety One тобының “Ескі таспа биі” деп аталатын клипінің жинаған даусы Төреғалидің “Бір түрлі қыз” әніне түсірілген клиптің жинаған дауыстан әлдеқайда көп екенін көрсеткен.
Осылайша ол ешкімді алдамағанын, бейнебаянның шынымен де аталған топтың туындысынан қалып қойғанын көрсеткісі келген.
Дегенмен Асхат өзіне бейәдеп сөздер айтқан әншінің нақты Төреғали екенін жазбаған. Аз уақыттан соң ол бұл жазбасын мүлдем өшіріп тастаған.
Ал желі қолданушылары болса, журналистің айтып отырғаны Төреғали Төреәлі екенін жазды.