Ғарыш саласын дамытудың қажеттілігі жыл өткен сайын артып келеді. Жаңа технологиялар өмірімізге етене еніп, күнделікті тіршіліктің бір бөлігіне айналған сайын ғарыш саласын игерудің маңызды екенін көптеген мемлекеттер түсініп жатқан жайы бар. Соның бірі – Қазақстан. Бұл ретте біз Қазақстанның Қорғаныс және Аэроғарыш өнеркәсібі министрлігі Аэроғарыш комитеті басшысының кеңесшісі, ҰҒА академигі Мейірбек Молдабековпен әңгімелесіп, отандық ғарыш саласының алдағы міндеттері туралы сұрап білген едік.
– Мейірбек мырза, еліміз ғарыш саласына бағытталған қаржының көлемі жыл сайын арттырып отырғаны белгілі. Кейбір сарапшылардың дерегінше, соңғы 10 жылдың аралығында Қазақстан ғарыштық жобаларға 1 млрд. долларға жуық қаржы бағыттаған екен. Осы ақпарат қаншалықты рас?
– Өздеріңіз де білесіздер, ғарыш саласы өте қымбат сала. Тек Қазақстан ғана емес ғарышты бүге – шігесіне дейін білетін алпауыт елдердің өзі осы саланы игеруге ондаған жылдарын жұмсап, нақты бір нәтижеге қол жеткізу үшін миллиардтаған қаржы бағыттайды.
Саланы білетін мамандар ғарыштың ауқымды инвестицияны талап ететінін жақсы түсінеді. Ал жаңа технологиялар дамыған сайын ғарыш саласынан пайда түсіру мүмкіндігі де артып келеді. Демек, кеткен шығынның орнын толтыруға әбден болады.
– Дегенмен де біздің бұл тараптағы жобаларымыз қаншалықты сәтті болды? Айталық, «Бәйтерек», «Есіл» және «KazSat-1» жобалары туралы не айта аласыз? Иә, ғарыш саласының үлкен қаражатты талап ететіні түсінікті. Бірақ, осы еңбектің нәтижесін қашан көре бастаймыз?
– Сіздер ілгеріде айтқан жобалардың барлығы да агенттік құрылғанға дейін болғанын ескерте кетейін. Бірақ, қателесу адам баласына тән ғой. Ғалымдардың пікірінше, қате тәжірибенің өзі тәжірибе болып саналады екен. Біз осыны ескеру керекпіз.
Ілгерідегі жобалар туралы нақтырақ айтар болсам, «Есіл» жобасының тиімділігі төмен болды. Осы себепті де бюджет ақшасын бекер рәсуәламау мақсатында жұмысы уақытша тоқтатылды. Ал «Бәйтерек» жобасы бойынша біз қазіргі таңда жұмыс істеп жатырмыз.
– Сөзіңізде алпауыт мемлекеттер туралы айттыңыз. Жалпы жаһандық тәжірибеде біздегі сияқты ауқымды әрі күрделі жобаларды жүзеге асыруға қанша уақыт жұмсалады?
– Сұрағыңыз орынды. Асықпай ойластырылған аса күрделі зымыран кешенін жасап шығу үшін ғарыштық елдердің өзі 25-30 жыл уақытын сарп етеді. Біздікі түк емес. Осынау жобаларға бес есе, он есе, кейде жүз есе артық қаржы шығындаған мемлекеттер бар.
Ал біз ұтылған жоқпыз. Айталық, «Бәйтерек» жобасын әзірлеу кезінде аса зор кадрлық-тәжірибелік әлеуетке ие болдық деп айта аламын. Иә, «KazSat-1» жобасын сөз еткенде, бұған тапсырыс берілген кезде бірқатар олқылықтар болғаны жасырын емес.
Алайда сарапшылар бұл арада мына бір жайтты назардан қалыс қалдырып жатыр. Осынау жер серігін өте сәтті ұшырып, алғашқы кезде 3 млрд. теңгеге жуық түсім әкеліп үлгерді.
Бұл жобаның жұмысы тоқтатылған кездің өзінде біз сақтандыру бойынша шығыс қаржысын толығымен қайтарып, «KazSat-3» жобасын іске асыруға жұмсадық. Осының нәтижесінде, бізде қазіргі таңда «KazSat-2» және «KazSat-3» байланыстық спутниктерінен тұратын толыққанды байланыс кешені жұмыс істеп жатыр.
Біле білсеңіздер, мұндай деңгейдегі отандық жүйе кез-келген мемлекетте бар деп айта алмайсыз. Тағы бір жақсы жақсы жаңалық, елімізде жерді қашықтықтан зондтау мақсатында пайдаланылатын жүйе іске қосылып жатыр. Мұның құрамында француздық әріпестер дайындаған «KazЕОSat-1» және «KazЕОSat-2» спутниктері бар.
Бастысы, мұның бәрі елімізге пайда әкеліп жатыр. Бес еселеп, он еселеп мемлекетке пайда түсіруде.
Жалпы бұл сала экономикалық тұрғыдан аса тиімді. Қазіргі таңда ғарыш нарығын назарға алар болсақ, мұның жер серіктерінен, зымыран ұшырудан, ғарышқа қатысы бар технологиялар жасаудан түсетін түсімнің көлемі аса мол. Сол себепті бұл салаға инвестиция бағыттау қажет.
Бұдан ұтылмаймыз.
Ғарыш саласының өзегі қолданбалы ғылыми зерттеулер екені әмбеге аян. Ал біздің еліміз индустриялық мемлекеттен инновациялық даму жолына түсуде. Осынау жауапты міндетті орындауда білікті мамандар мен негізгі қозғаушы күш беруші ретінде Қазақстанның ғарыш ғылымы болды және бола береді де.
Дау туғызбас ақиқат, ғарыш саласы ғылымға аса мұхтаж. Бұл саланың өнімдері аса жоғары технологиялық өнімдер. Ғарыш техникасы мен технологияларын дайындау экономика салаларының міндеттерін шешуге арналған.
– Сөзіңіз аузыңызда. Ғарыш саласындағы ғылым туралы айттыңыз. Жалпы бұл бағытта елімізде қандай істердің басы қайырылды?
– Бұл бағытта да атқарылған іс аз емес. Өздеріңіз білесіздер кезінде астрофизика және де Жер әлемнің ионосферасы мен Жерді қашықтықтан зондтау (ЖҚЗ) саласындағы ғылыми-тәжіриблік зерттеудің дәстүрлі бағытын дамытатын 3 ғылыми институтты: Фесенков атындағы Астрофизикалық институтын, Ионосфера ғылыми институтын және де Ғарыштық зерттеулерге арналған институтын біріктіретін атақты академик Ө.Сұлтанғазин атындағы Ұлттық ғарыштық зерттеулер және технологиялар орталығын құрған болатынбыз.
Міне, осылар – біздің бұрынғы агенттіктің, бүгінгі министрлік құрамындағы Аэроғарыш комитетіндегі жұмыстардың теориялық-ғылыми іргетасы болып саналады.
– Жоғарыда өзіңіз айтып кеткендей ғарыш саласын дамыту үшін, жалпы бұл салаға тың серпін беру үшін ғарыш техникасы мен технологиялары қажет. Бұл тарапта отандық жобалар жасала ма алдағы уақытта?
– Әрине. Алайда барлығы уақыттың еншісінде. Бұл бағытты іске асыру бойынша осыдан сегіз жыл бұрын Ұлттық ғарыштық зерттеулер және технологиялар орталығының құрамына қарайтын Ғарыштық техника және де технологиялар институты (ҒТТИ) құрылған еді.
Осы сегіз жылдың аралығында ҒТТИ келесідей нақты нәтижелерге алып келген ғарыштық техниканың қазақстандық үлгілерін жасау бағыты бойынша ғылыми-зерттеулік және де тәжірибелік-конструкторлық жұмыстарды нәтижелі атқарды.
Бұған мысал келтіре кеткенім жөн болар. Айталық, нақты дәлдік беретін спутниктік навигация жүйесіне (ЖДСНЖ) арналып әзірленген дифференциалды станцияларды /ДС/ дайындау бағыты бойынша тәжірибелік-конструкторлық істер мәресіне жетіп, 50 данадан тұратын үлгілік партиясы әзірленді.
Бұлардың бәрі де еліміздің аумағында орналастырылып, қазіргі таңда нақты жоғары дәлдікті спутниктік навигация жүйесінің кешенінде жұмыс істеп жатыр.
Бұл ғана емес, сонымен бірге ЭВАК жүйесіне арналып (автожолдарда авария және апаттар кезінде шұғыл шақыру жүйесі) борттық терминалының заманауи 10 үлгілік түрі және диспетчерлік орталығы жасалды. Айта кетсем, бұлардың пилоттық үлгісі бүгінгі күні Инвестиция мен даму министрлігінің Ахуалдық орталығында сынақтан өтіп жатыр.
Сондай-ақ ЖШС «ПФ Взлет-Казахстан» жылу тораптары үшін жинақтау мен деректер берудің 1000 модемі жасалып, өндіріске енгізілді.
– Соңғы кездері сарапшылар тарапынан «ғарыш ғылымының жетістіктерін ауыл шаруашылығына да енгізу қажет» деген пікірлер айтылып жатыр. Қазақстанның ғарыш саласы бұған дайын ба?
– Дайынбыз және нәтиже де бар. Қазіргі таңда егіс науқаны кезінде қауіпті зиянкестердің таралу аймағы бойынша деректер базасын жинаудың роботты жүйесінің 5 комплектісі қолданыста жүр.
Бүгіннің өзінде тапсырыс берушілерге 2 дербес суперкомпьютер құрастырылып берілді. Жалпы айтқанда, институт ғарыш құрылғысының 5 құраушысы мен ғарыш жүйелерінің өнімдері және де қызметтеріне техникалық қол жеткізу үшін барын салуда.
Бұл мақсатта Қазақстан экономикасының әрқилы салаларындағы тұтынушыларына аса қажетті 14 арнайы құрылғылық бағдарламалық құралдардың (АБҚ) тәжірибелік үлгілерін әзірледі.
– Бұл түсінікті делік. Ал ғарыш жүйесі үшін қандай жағымды жаңалықтарыңыз бар?
– Бұл тарапта да екі қолды бос қойып отырған жоқпыз. Бүгінгі таңда отандық ғалымдардың көмегімен ғарыш аппаратының орналасқан орнын анықтау мақсатында жасалған арнайы GPS-модульдерін және де радиобайланыс жүйесін қолданысқа енгіздік. Ең бастысы бұлардың бәрі де Қазақстанда жасалған өзіміздің отандық өнім.
– Демек еліміз ғарыш саласындағы атқарған жұмысының жемісін көріп жатыр деп айтуға негіз бар ма?
– Әрине. Өзіңіз алып қараңыз, қазіргі таңда:
– Қашықтықты лазермен өлшейтін және жергілікті жерге арналған дифференциалды түзету жүйесі;
– маркшейдерлі істерді автоматтандыру жүйесі;
– тау көліктері басқарудың роботтандырылған жүйесі;
– тәуелсіз навигация және байланыс жүйесі;
– жоғары дәлдікті спутниктік навигация жүйесіне (ЖДСНЖ) арналып дайындалған дифференциалды стансысы жұмыс істеуде.
Ең бастысы мұның барлығы да отандық мамандардың қатысуымен жүзеге асырылды. Мінекей, осылайша еліміз ғарыштық техниканың қазақстандық жоба-үлгілерін жасау және де оларды өндіріске кіріктіру саласында алға ілгеріледі.
Сосын біздің елдің ғарыш саласындағы атқарған жұмысына әлем куә. Еліміздің ғарыштық түйіндемелері жаһандық нарықта нақты сұранысы бар бұйымдардың тәжірибелік өндірісін ұйымдастыру үшін шағын және орта бизнеске беруге әзір.
Мәселен егер заңдық тұрғыдан алғанда ЭВАК жүйесі үшін борттық терминалдарына тек ішкі сұраныс 4 млн данаға жетеді екен! Ал бас бостандығынан айырылғандардың абақтыдағы жүріп-тұруын айқындау үшін мониторинг жасайтын электрондық білезіктерге сұраныс 45 мың дана, ал дифференциалды стансаларға нақты сұраныс 100 данадан асып жығылып отыр! Бұл нәтиже емей не?
– Бұған қатысты аталған тауарлардың өзіндік құнына қатысты сауал көп…
– Иә, дұрыс айтасыз. Бұл орайда сатып алынатын ғарыштық техниканың бөлшектері мен тетіктерінің жалпы құны осы дайын бұйымдардың өзіндік құнының жартысына да жетпейтінін айта кетейін. Неге десеңіздер дайын шетелдік өнімдегі «soft» бағасы өте қымбат.
– Шетелдік өнім деп отырсыз, осы шетелдік өнімге қарағанда қазақстандық өнім несімен артық? Айталық, басымдығы қандай?
– Бұл бірінші кезекте ақпараттық қауіпсіздіктің болуы. Еліміздің қорғанысы мен ұлттық қауіпсіздігі тұрғысынан алғанда аса маңызды мәселе. Тағы бір басымдығы жобалық және ғылыми жұмыстардың арзандығы. Үшіншіден, өнім бағасын құраушы артық шығындардың аздығы.
Еліміздегі осындай ғарыштық түйіндемелер тұтынушылардың ғарыштық жүйелердің өнімдері мен қызметтеріне қолжетімді болуына, сөйтіп, бүгіннің өзінде олардың импорттық нұсқасын алмастыруға мүмкіндік бере алады.
– Ал Қазақстандағы ғарыш саласына инвестиция құюға келгенде қандай мәселелер бар?
– Иә, проблемалар бар. Соның бірі еліміздің әлеуетіне түк бермейтін шетелдік технологияларын пайдалануға әуеспіз біз. Ғарышқа арнап жасалған отандық өнімді пайдаланудың басымдығы өте көп. Ең бастысы ақша Қазақстанда қалады әрі отандық компанияларға инвестиция болып табылады.
Сонымен қатар бұл ғарыш өнімдері мен қызметтерін пайдаланушылардың аппараттық-бағдарламалық құралдарын әрдайым технологиялық жағынан жаңартып отыруға және де жаңғыртуға жол ашады.
Менің айтарым, қазіргі таңда ғарыш құрылғылары әлемдік нарықта ашық сатылымда жүр. Бұл нені білдіреді? Яғни, керекті бағдарламалық математикалық қамтамасыз ету жобаларын дайындау біздің қазақстандық мамандарымыз бен ғалымдарымыздың да қолынан келеді.
– Осыған орай тағы бір сауал. Қазақстандағы ғарыш ғылымының материалдық-техникалық базасы қандай деңгейде осы?
– Жасырып жабары жоқ халықаралық деңгейге жете алмай отыр. Ғарыштық технология әрдайым жаңартылып отырылуы тиіс, ең алдымен, тәжірибелік жабдық жаңартуды қажет етеді.
Осындай базаның болмауы біздің ғалымдардың жаңа ғылыми-техникалық әзірлемелерін әлемдік деңгейге шығаруға кедергі келтіруде. Дегенмен, мұның бәрі уақыттың еншісінде деп санаймын. Кемшілік түзетіледі, көш жүре түзеледі ғой.
Мәселен қазір неғұрлым экономикалық жаңа технологияларды айырбас жолымен алу тиімді болып отыр. Бір бір жағынан айырбас, көп жағдайда ғылыми зерттеулер сатысында да анағұрлым жеңіл.
Сөзімнің тоқ етерінде айтарым ғарыш саласындағы зертханалық және де тәжірибелік-эксперименттік базамызды үнемі жаңартып отыруымыз қажет. Бұл өз кезегінде шетелдік әріптестеріміздің қызығушылығын туғызатын болады, бұл бір жағынан ғылыми әріптестікті кеңейту мен тереңдету үшін жағдайлар туғызар еді.
– Әңгімеңізге рақмет!