Сұлулық салонына кетіп, сол күйі үйіне оралмаған қарағандылық қыз табылды.
Жезқазған қаласының тұрғыны БАҚ-тарда жарияланған суреттерден қызды танып, туған-туыстарына хабарлаған. Қазір қыздың өміріне ешқандай қауіп төніп тұрған жоқ. Қазіргі уақытта ол үйінде, – деп хабарлады Тengrinews.kz.
“Бізге бір әйел хабарласып Ырысжанның оның үйіне сіңлісімен бірге қонаққа келгенін айтты. Олар сол күні сол үйде қонып, ал келесі күні жұмыс іздеуге кеткен екен. Әйел бізге мекенжайын айтты, содан Ырысжанның әкесі Жезқазғанға кетті. Қызды үйге әкелді. Қуанышқа орай, қыздың жағдайы жақсы”, – деді Бекболат Нұржанов.
Сондай-ақ, қыздың неліктен ата-анасына ештеңе айтпай басқа қалаға кетіп қалғаны белгілі болды. Ырысжанның әкесінің айтуынша, қызы осылайша өз бетінше өмір сүргісі келген.
“Ырысжан негізі әлі бала. Қызымыздың үйден осылайша кетіп қалуының себебі ол бізге көмектескісі келді. Жұмыс істеп, ақша тапқысы келді. Жалдамалы пәтерінің ақшасын өзі төлегісі келді. Түсінесіздер ме, мен үнемі жұмыста боламын. Балаларымның қалай өсіп жатқанын мүлде көрмеймін деп айтуға болады.
Бізде де несиелер бар. Ырысжан мұның барлығын көріп, түсініп отыр.
Біз ақшадан қатты қиналып жатқан жоқпыз, бірақ шетелге демалуға баратын жағдайымыз жоқ. Ол биыл мектеп бітірді. Грантқа түсуге бірнеше балл жетпей қалды. Осылайша, ол бізге көмектескісі келді”, – дейді қыздың әкесі.
Ол үйдегілердің қызына ҰБТ деп ешқашан қысым көрсетпегенін айтады. Қыз отбасының үлкені екен. Қазіргі уақытта Ырысжан барлығынан кешірім сұрады.
“Біз онымен сөйлестік. Ол барлығын түсінді. Бастапқыда білім алу керектігін түсіндірдік. Оқуға түсе ме, әлде жұмыс істей бере ме – оны әлі шешпедік. Қызымды іздестіруге көмектескендердің барлығына алғыс айтамын. Ақпараттық агенттіктеріңізге, полицейлер мен еріктілерге рақмет айтамыз! Мұндайды ешкімнің басына салмасын”, – дейді табылған қыздың әкесі.
Еске сала кетейік, Қарағанды облысы Қарқаралы ауданының 18 жастағы тұрғыны Ырысжан Нұржанова 15 тамызда салоннан шыққан күйі үйіне оралмаған еді.