Көлікті заңсыз тіркеген топ құрықталды
Құжатты қолдан жасаған, ВИН-кодты цехта өзгерткен. Алматыда 150-ден аса көлікті заңсыз тіркеген қылмыстық топ құрықталды. Олар арнайы халыққа қызмет көрсету орталығының мамандары мен делдалдар. 17 адамды құрықтау үшін полиция прокуратурамен бірлесіп арнайы операция ұйымдастырған.
«VIN кодтарды өзгертумен айналысқан жерасты цехының жұмысы әшкереленді. Тіркеуге заңсыз қойылған 150-ден астам автокөлік анықталды. Қылмыстық әрекетке арнайы халыққа қызмет көрсету орталығы қызметкерлерінің және делдалдардың қатысы анықталды. Бір дропперге 50 автокөлікке дейін тіркелген. 17 күдікті ұсталды», – деді ҚР ІІМ Ұйымдасқан қылмысқа қарсы күрес департаментінің өкілі Қуандық Алпыс.
Қылмыстық топтың кесірінен мемлекетке 320 млн теңгеден астам шығын келген. Күдіктілерді құрықтан кезде айғақ заттар тәркіленді. Шетелдік нөмірмен жүрген көліктерді заңсыз есепке алумен айналысқандар бұған дейін де бірнеше қаладағы Халыққа қызмет көрсету орталықтарында ұсталған.
«Биыл ІІМ-не осындай қылмыстық істер жайында 61 материал жібердік. Айта кетейік ,бұл көліктер бұған дейін Қазақстан аумағында заңды тіркелген. Олар әртүрлі себеппен Қазақстан аумағынан шығып кеткендіктен тіркеуден алынған. Ол автокөліктер кімде қалады, қалай болады, ол енді тергеуде анықталады», – деді «Азаматтарға арналған үкімет» МК Алматы қаласы бойынша филиалының қауіпсіздік жөніндегі уәкілі Тимур Қоқамбеков.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе