ОҚО Сарыағаш ауданындағы зорланды деген 7 жасар баланың ісін қадағалау үшін шетелден сарапшылар келді.
Бұл туралы қоғам белсендісі Аружан Сайын өзінің Instagram-парақшасында жазды.
“Бүгін отандық және шетелдік сарапшылардың қатысуымен кезекті тергеу жұмыстары жүргізілді. Оған Грузия, Қырғыз елі және Ресей мамандары қатысуда. Барлық сарапшы істі жарияламау туралы қолхат жазып берді. Біз қорытындының әділ болатынына үміттенеміз.
Сексуалды зорлық-зомбылық ісіне қатысты тергеу құпия жүретіндіктен ондағы мәліметтерді ешкім жария ете алмайды.
Барлық мәліметті ҚР Бас прокуратурасының өзі беруі тиіс. Алда әлі өзге де экспертизалар күтіп тұр”, – деді Аружан Сайын.
Соған қарағанда ОҚО-да зорланды делінген баланың ісіне қатысты ақпарат жағынан үзіліс болатын секілді.
Өйткені халықаралық бала құқығы конвенциясына жүгінген шетелдік сарапшылар бұл істі қадағалауда сот шешімі шықпай қандай да бір мәліметтің сыртқа шығуына жол бермесі белгілі.
Қоғам белсендісі сондай-ақ, баланың анасына көмектесіп жатқан барлық жомарт жандарға алғысын айтты.
“Баланың анасы алғыс айтып жатыр. Әрине, оған қазір өте ауыр, бірақ ол қандай жағдай болмасын, өз ұлын соңына дейін қорғауға дайын”, – деді ол.