Елжан Біртанов Үкімет басшысынан көмек сұрады
ҚР Денсаулық сақтау министрі Елжан Біртанов менингококк вирусына қарсы күрес бойынша жүргізіліп жатқан іс-шаралар тиімділігін бағалау мақсатында Алматы қаласы мен Алматы облысына іссапарға шығады, деп хабарлайды ҚазАқпарат.
Біртанов Алматыдағы аса қауіпті вирустар зертханасының жұмысы туралы айтты.
«Бекітіліп, жүргізіліп жатқан іс-шаралар тиімділігін бағалау мақсатында бүгін Алматы қаласы мен Алматы облысына іссапарға шығуды жоспарлап отырмын. Іссапар қорытындысы бойынша, қажет болған жағдайда қабылданатын шараларға өзгерістер енеді», – деді ҚР Денсаулық сақтау министрі Елжан Біртанов бүгінгі Үкімет отырысында.
«Аталған сырқаттан 13 адам қайтыс болды: Алматы облысында – 4, Қызылорда облысында – 1, ОҚО – 2, Алматы қаласы – 6 адам. Өкінішке қарай, қайтыс болғандар арасында алты бала бар», – деді министр.
Сондай-ақ, ол менингитпен күрес бойынша арнайы штаб құрылғанын хабарлап, Премьер-Министрден штаб жұмысына көмек беруді сұрады.
«Құрметті Бақытжан Әбдірұлы, облыс әкімдеріне, денсаулық сақтау басқармаларының өңірлік штабтарының тиісті жұмысын және бекітілген республикалық штабтың жоспарын, тапсырмаларын мүлтіксіз орындауды қамтамасыз етуді сұраймын.
Сонымен бірге, ҚР Жедел медициналық көмек көрсету туралы қағидаларын бекіту туралы №450 бұйрыққа сәйкес, кезек күттірмейтін жағдайлар кезінде медициналық көмек жақын жердегі медициналық ұйымда көрсетілуі тиіс.
Облыстардың емдеуге жатқызу тәртібі туралы барлық бұйрықтарды Денсаулық сақтау министрлігінің бұйрықтарына сәйкес келтірілуі тиіс», – деді министр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе