Бүгiн Сенатта ҚР Қаржы министрi Бақыт Сұлтанов 2018-2020 жылдарға арналған бюджет жобасын таныстырды.
Бұл туралы Baq.kz хабарлайды.
«Бюджет шығыстарының бағыттарына тоқталсақ, бiрiншi бағыт – адами капиталды дамыту. Бюджеттiң әлеуметтiк бағыты сақталған. Үш жылда әлеуметтiк салаға қарастырылған қаржы көлемi 13,4 трлн теңгенi, 2018 жылы 4,1 трлн теңгенi немесе жалпы шығыстар көлемiнiң 44,6 пайызын құрайды. 2020 жылға қарай бұл көрсеткiш 47,4 пайызға жетедi. Әлеуметтiк шығыстардың негiзгi көлемi ел азаматтарын әлеуметтiк жағынан қамтамасыз етуге және әлеуметтiк көмек көрсетуге бағытталған. Жоспарланған кезеңде аталған бағытқа 8 707,5 млрд теңге бөлу көзделген. Оның iшiнде 2018 жылы 2 612,9 млрд теңге қарастырылған, бұл биылы жылы көрсеткiштен 473 млрд теңгеге немесе 22,1 пайызға артық», – дед министр.
Еске сала кетсек, 2018 жылдың 1 шiлдесiнен бастап базалық зейнетақы төлемiн тағайындау тәртiбi өзгерiп, оның көлемi үш кезеңмен ұлғайтылады.
Атап өтсек, кеше Мәжіліс 2018-2020 жылдарға арналған бюджет жобасын бекіттi. Отырыста Үкімет мүшелері мен депутаттар «2018-2020 жылдарға арналған республикалық бюджет туралы» ҚР заң жобасын ұзақ талқылады.