Белгілі журналист Бейсен Құранбек Талдықорғандағы көшенің Жансүгіров аталуына наразы.
Бұл туралы журналист Facebook-тегі жеке парақшасында жазды.
«Талдықорғандағы ең ұзын көше – ЖАНСҮГІРОВ көшесі. Жансүгіров деген адам тарихта болмаған. Жансүгір деген болған. Ол кісі – Ақсуда туып, алашқа аты шыққан ақиық ақын Ілиястың әкесі. Ал көше Ілиясқа берілген. Олай болса, көшенің аты неге ІЛИЯС КӨШЕСІ деп аталмайды?
Советтік кезеңнің өзінде АБАЙ КӨШЕСІ деп атадық ғой, АБАЙ ҚҰНАНБАЕВ КӨШЕСІ емес. Немесе ІЛИЯС АҚЫН көшесі. Талдықорғанда АҚЫН САРА деген жап-жақсы атаулы көше бар ғой. Тым болмаса, ІЛИЯС ЖАНСҮГІРҰЛЫ» көшесі.
«ОВ» пен «ЕВ»-тің қажеті қанша? Оны бәрібір кейінгі ұрпақ алып тастайды.
Сондықтан кейін өзгертпеу үшін көшенің атын бірден дұрыстап қою керек-ау» делінеді тележурналисттің жазбасында.
Бүгін Алматы қаласында да ең ұзын көшенің бірі – Фурманов ҚР Президентінің құрметіне Нұрсұлтан Назарбаев даңғылы деп қайтадан жаңартылғанын айта кетелік.