Қазақстанның ғарыш саласының болашағы зор. Бұл бағытта алдағы уақытта ауқымды жобалар жасалып, іргелі істер атқарылатын болады.
Бұл жайында Премьер-Министрдің бірінші орынбасары Асқар Мамин айтып берді. «Байқоңыр» ғарыш айлағының болашағы туралы пікір білдірген Маминнің айтуынша, еліміз егемендік алғалы бергі уақытта «Байқоңыр» ғарыш айлағынан мыңдаған зымыран ұшырылған.
“Қазіргі таңда ресейлік Роскосмоспен бірлесе отырып, ғылыми маңызы бар зерттеу жұмыстарын жүргізіп жатырмыз. Сонымен қатар алдағы уақытта «Бәйтерек» зымыран кешенін де іске қосуды жоспарлап қойдық. Осының арқасында Қазақстан ай сайын бір жер серігін ғарышқа ұшыра алатын мүмкіндікке ие болады. Еліміз «Байқоңырды» жаңарту мен кеңейту шараларына қаржы бөлуді әрі қарай да жалғастыра беретін болады», – деді Асқар Мамин Қазғарыштың 25 жылдығына арналған ауқымды форумда.
Аталған жүйені мемлекеттік органдарда, жеке секторда пайдаланып келеді екен.
«Айталық, жерді қашықтан зонтдау жүйесінің мәліметтерін Ауыл шаруашылығы министрлігі, Қорғаныс министрлігі, Ішкі істер министрлігі тұрақты түрде қолданып отырады. Бірақ, бұл аздық етері анық. Біз еліміздің ғарыш саласындағы әлеуетін одан ары дамытатын боламыз. Неге десеңіздер, ғарыш технологиялары кез-келген экономикалық-әлеуметтік дамуына айтарлықтай үлес қосатын маңызды фактор», – деді А.Мамин өз сөзінде.
Естеріңізге сала кетсек, үстіміздегі жылы Қазақстанның жаңа екі жер серігі ғарышқа ұшырылады.
«Биылғы жылдың соңында бір тағы екі жаңа жер серігін ғарышқа ұшырайын деп отырмыз. Аталған құрылғыларды Қазақстан мен Ұлыбритания мамандары құрастырды. Бүгінде аталған жоба 98 процентке дайын. Соның арқасында қазақстандық мамандардың бес бірдей жаңалығы сынақтан өтеді. Ол мамандардың барлығы Еуропа мен Ресейде тәжірибе жинақтап қайтқан», – деді бұл орайда Қорғаныс және аэроғарыш өнеркәсібі вице-министрі Марат Нұрғожин.
Нұрғожиннің нақтылағанындай, осы бес жаңалықтың ішінде жер серігінің қызметтік платформасы да бар. Ал бұл жерді қашықтан зондау серіктерін өз жерімізде жасауға мүмкіндік береді екен. Бұдан сырт, ғарыш жүйесінің сегменті, жер серігінің борткомпьютері, оптикалық жүйе және күн датчигі бар. Бұның барлығы биыл алғаш рет ғарышта сынақтан өтетін болады.
«Мұның барлығы маңызды жобалар. Солардың бірі де бірегейі – ғарыш құрылғыларын құрастыру және сынақтан өткізу кешені. Биылғы жылғы шілденің 1-іне дейін біз технологиялық құрал-жабдықтарды орнатуды аяқтауымыз қажет. Ал екінші жартыжылдықта сынақ жұмыстарын бастаймыз. Және желтоқсанның аяғына таман аталған кешенді пайдалануға беруді көздеп отырмыз. Міне, сол кезде біз ғарыш аппараттарын өзіміз құрастырып, өзге елдердің тапсырыстарында қабылдайтын жағдайға жетеміз. Бұл жоба «Airbus Defence and Space» компаниясымен бірлесіп атқарылып жатыр. Олар шамамен 29 млн еуро көлемінде қаржы құйды», – деп атап көрсетті осы ретте М.Нұрғожин.