Бас көліктік прокуратурасы Алматы облысында ЯК-12 ұшағының құлауына қатысты пікір білдірді.
Бұл туралы Sputnik Қазақстан хабарлайды.
Ведомство мәліметінше, ұшқыш пен жолаушы қаза тапқан. Бастапқы деректер бойынша, жолаушы шаруашылық қожалығының өкілі.
Көліктік прокуратура Инвестиция және даму министрлігіне сілтеме жасап, ұшақтың тиісті рұқсатнама құжаттары болғандығын, әуе навигациясы органдарымен келісе отырып, ұшқандығын мәлімдеді.
“Инвестиция және даму министрлігі авиациялық оқиғаны тергеу туралы бұйрық дайындауда, соның аясында ұшақ апатының себебі анықталады”, — деді ведомство.
Азаттықтың хабарлауынша, қаза тапқан екі адамның есімі белгілі болған. Олар 54 жастағы пилот Хамит Ақбергенов пен 39 жастағы кәсіпкер Масимжан Масимов.
Еске сала кетсек, 27 шілдеде Алматы облысы Панфилов ауданы Шолақай ауылында ЯК-12 ұшағы құлап, жанып кеткен. Ұшақтың ішінде болған екі адам қаза тапты. ЯК-12 ұшағы “ҚазАвиа” әуе компаниясына тиесілі.