Ақтөбе облыстық ішкі істер департаментінің архивінде репрессияның құрбаны болған 13 мың адамның ісі сақтаулы тұр.
Олардың 617-сі түрлі себептерге байланысты әлі күнге дейін ақталмаған деп хабарлады Хабар-24.
Архивте жаппай қуғын-сүргінге ұшыраған азаматтардың әйелдеріне қатысты 28 іс бар. Олардың барлығы сотталып, «Алжир» лагерінде жазаларын өтеген.
Көбі, сол кеткеннен оралмаған. Жалпы сол ақтаңдақ жылдары тек Ақтөбенің өзінен 7000 адам айдалып, 1500 адам ату жазасына кесілген екен.
Айжан Бауыржанқызы, қала тұрғыны:
– Яғни менің аталарым репрессияға ұшыраған. Бәйімбетов Өтеш, Бәйімбетов Сәрсен деген екі ағайынды кісі болған. Оларды кезінде малдары көп болды деп, қойлары, сиырлары көп болды деп, бай болды деп тұтқындап алып кеткен. 1937 жылдары тамыз айында оларды репрессияға ұшырап, алып кеткен, яғни атып тастаған деп естідім. Ол кісілерге, ата-әжеміз, әкелеріміз Түйетөбенің басына барып, құран бағыштап тұрамыз.