Қазақстан мен Қырғызстан полициясы ауған апиыны тізбегінің жолын кесті

Қазақстан және Қырғызстан Ішкі істер министрліктері апиын тобына жататын есірткі заттарын жеткізудің сыртқы трансұлттық арнасын жойды. Бірлескен арнайы операция барысында Шымкент қаласында Қазақстанның екі азаматы ұсталды.

«Олардан шамамен 5 келі ауған апиыны есірткі заты тәркіленді. Аталған факті бойынша Қазақстан Республикасы Қылмыстық кодексінің 297-бабының 3-бөлігіне сәйкес сотқа дейінгі тергеп-тексеру басталды», – деді ІІМ есірткі қылмысына қарсы іс-қимыл комитетінің басқарма бастығы Бақытжан Әмірханов.

Күдіктілер уақытша ұстау изоляторына қамалды. Қазіргі уақытта олардың әрекеттеріне есірткі контрабандасы және трансұлттық ұйымдасқан қылмыстық топқа қатысу белгілері бойынша қосымша құқықтық баға беру мәселесі қарастырылып жатыр.