Астанада ер адам сарбаздарға пышақ ала жүгірген

Ұлттық ұланның Астаналық құрама сарбаздары көшеде суық қарумен әскери жасаққа қарсы ұмтылған бұзақыны ұстады, деп хабарлайды Baq.kz ақпарат агенттігі.
Астана қаласы Жирентаев көшесінің бойында қоғамдық тәртіп пен қауіпсіздікті бақылап жүрген жедел құраманың әскери жасағына шабуыл жасалды. Дәлірек айтсақ, ұландықтарға қарсы келе жатқан қырықтар шамасындағы белгісіз азамат бірден күдік туғызды. Жақындай бергенде әлгі азамат жалаңдатып пышағын алып шығып, әскерилерге қарай бас салған. Алайда қорғаудың да, қорғаныстың да түрлі әдіс-айласын меңгерген жасақ шапшаң әрекет ете білді. Жасақ жауынгері қатардағы Гасанбек Бабаханов бұзақының қолын жылдам қағып жіберіп, пышағын ұшып түсірді де, аяғымен баса қойған. Жасақ бастығы қатардағы Бекарыс Демесенов пен екінші патруль қатардағы Құрманғазы Кесікбай осы сәтте қолын артқа қайырып, күдіктіні ұстаған.