“Салдақы” деп нем бар еді?”. Атырауда жеңгесімен жұлысқан бойжеткен жауапқа тартылды

Атырау облысында алимент төлемей жүрген бұрынғы күйеуіне шағымданған келіншек ақыры қайынсіңлісін де сотқа беруге мәжбүр болды.

Бұл туралы Атырау облысы Исатай аудандық сотының баспасөз қызметі хабарлады.

Атырау облысының Исатай аудандық сотында ҚР Әкімшілік құқықбұзушылық кодексінің 434-бабының 1-бөлігімен К. деген азаматқа қатысты әкімшілік іс қаралды. Сот отырысында анықталғандай, ажырасқан келіншек бұрынғы күйеуінен алимент бойынша қарызын өндіру туралы талабымен жеке сот орындаушыға жүгінген. Жеке сот орындаушы өз көмекшісін борышкердің мекен-жайын анықтап келуге жұмсайды. Жеке сот орындаушының көмекшісімен келіншек бұрынғы күйеуінің үйіне барады, сол кезде оның қарындастары алдынан шығып, арада өзара дау туындайды. Ұрыс-керіс кезінде қайынсіңлісінің бірі бұрынғы жеңгесін «салдақы» деп тілдеген.   Ар-ожданына нұқсан келтіргені үшін келіншек бұрынғы қайынсіңлісін де жауапқа тартуды сұрап, сотқа шағымданды.