Нұрсұлтан Назарбаев “Татарстанға сіңірген еңбегі үшін” орденімен марапатталды
Мемлекет басшысы Нұрсұлтан Назарбаев Татарстан Республикасының президенті Рустам Миннихановпен кездесті.
Бұл туралы stan.kz Ақорданың баспасөз қызметіне сілтеме жасап хабарлайды.
Мемлекет басшысы Миннихановты Ресей күнімен құттықтап, екі ел арасында қалыптасқан достық қатынастар туралы айтты.
“Ресеймен де, Татарстанмен де арамызда достық қарым-қатынас орныққан. Қазақтар мен татарлар тарихы, мәдениеті, тілі мен әдет-ғұрпы жағынан бір-біріне өте жақын. Экономикалық байланыстарымыз да жақсы. “KAMAZ” кәсіпорнымен жұмыс жүргіміз келеміз, Алматыдағы тікұшақ зауытына қатысты жобаны іске асырудамыз. Осы және басқа да экономикалық байланыстарды, соның ішінде мұнай химиясына қатысты байланысты жалғастыра беру керек”.
“Бүгін ЭКСПО-дағы экспозициямызды аштық. Сонымен қатар, Қазақстандағы серіктестерімізбен бірге болашақ жоспарларымызды талқыладық. Көрме кешені мені қайран қалдырды. Сізді көрменің ашылуымен құттықтаймыз. Сондай-ақ, қала көшесіне Сүйімбикенің аты берілуіне орай ризашылығымды білдіремін”, – деді Минниханов.
Нұрсұлтан Назарбаев пен Рустам Минниханов “Батыс Қытай – Батыс Еуропа” жолын салу аясындағы инфрақұрылымдық жобаларды іске асыру және Қазақстан мен Татарстанның көліктік-транзиттік әлеуетін арттыру мәселелерін талқылады. Кездесу соңында Минниханов Қазақстан президентін “Татарстан Республикасына сіңірген еңбегі үшін” орденімен марапаттап, Мемлекет басшысын Татарстанға келуге шақырды.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе