Лондондағы көпірде және Боро базары аумағында екі оқыс оқиға болды.
Олар теракті деп бағаланды. Жексенбіге қараған түні болған оқиғаны түсірген видео әлеуметтік желіде пайда болды. Онда Лондон көпіріндегі адамдарды қатты жылдамдықпен келіп соққан автомобильден қолдарына пышақ ұстаған адамдар атып шығып, өтіп бара жатқан жүргіншілерге шабуыл жасайды. Кадрларды Daily Mail басылымы жариялап отыр.
БАҚ 7 адамның ажал құшқанын, 20- дан астамының жарақаттанғанын хабарлауда. Бұдан басқа осы кеште Воксхолл ауданында тағы бір төтенше жағдай болды, бірақ бұл лаңкестікке жатқызылған жоқ.
Лондондағы террорлық актілерден зардап шеккендер ішінде Қазақстан азаматтары жоқ. Бұл жайында ҚР СІМ баспасөз қызметінің жетекшісі Әнуар Жайнақов өзінің Фейсбуктегі парақшасында жазды.
«Лондон полициясы бүгін түнде болған оқиғаны террористік әрекет деп бағалады. Осы уақытқа дейін бар ақпарат бойынша,
Лондондағы шабуылдар салдарынан қаза болған және зардап шеккендердің арасында Қазақстан азаматтары жоқ.
Бұл алдын ала ақпарат. Қазақстанның Ұлыбританиядағы елшілігі тиісті анықтау жұмыстарын жалғастыруда», – деп жазды Әнуар Жайнақов.