80 жастағы астаналық Кейптаундағы марафонды толық жүгіріп өтті
Астананың халықаралық әуежайында 80 жастағы марафоншы Салтанат Түйтебаевты қарсы алу рәсімі өтті. Әуежайда оны қалалық дене шынықтыру және спорт басқармасының басшысы Василий Левит, жақындары мен туыстары, сондай-ақ жанкүйерлері қарсы алды.
«Сіз үшін қатты алаңдадық, аман-есен елге оралғаныңызға қуаныштымыз. Сізді қарсы алу біз үшін үлкен мәртебе», – деді Василий Левит.
Оның айтуынша, ол марафон фавориттерінің қатарында болған және жарақат алмағанда жүлделі орыннан көрінуі мүмкін еді.
«2027 жылы Жапонияда өтетін ардагерлер олимпиадасында есемді қайтарамын», – деп уәде берді спортшы.
Марафоншы күн сайын жүгіруді жалғастырмақ.
«Мен таңертең жүгіремін. Физикалық дайындығымды сақтап, барлық жарысқа қатысуға тырысамын. Немерелерім мен шөберелеріме белсенді әрі салауатты өмір салтының үлгісі болғым келеді», – деді Салтанат Түйтебаев.
Салтанат Түйтебаев – Қазақстан Республикасының халықаралық дәрежедегі спорт шебері. Еске салсақ, 2025 жылы ол Нью-Йорк марафонында 80-89 жас санатында чемпион атанып, қашықтықты 4 сағат 45 минутта бағындырған.
Бұған дейін, 2021 жылы Аустралияда өткен ардагерлер арасындағы әлем чемпионатында 75-79 жас санатында күміс медаль иеленген. Сондай-ақ ол Жаңа Зеландияда өткен ардагерлер олимпиадасының чемпионы атанған.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе