40 жастағы итальян қызы өзіне өзі үйленді.
Бұл туралы Baq.kz ақпарат агенттігі lenta.ru-ға сілтеме жасап хабарлайды.
Итальян қызы Лаура Меси дүркіретіп той жасады. Тойға 70 шақты қонақ пен қалыңдықтың достары да жиналды. Бұл тойда салтанатқа қажетті қызықтың барлығы да болған: торт, ақ көйлек т.б. Бірақ, бір таңғаларлық тұсы онда ең басты адам – күйеу жігіттің болмауы.
Екі жыл бұрын Меси 12 жыл кездескен жігітімен айырылсып кеткен көрінеді.
«Мен алдымен әрқайсымыз өз-өзімізді жақсы көруіміз керек деп ойлаймын. Ханзадасыз да ертегілер бола береді», – дейді ол.
Қалыңдық мұнымен батыста дамып келе жатқан «жұбайсыз өз-өзіне үйлену» трендін нығайтпақ болған.
«Егер мен болашағымыз туралы ойлайтын жігітті кездестіретін болсам, бақытты болар едім. Бірақ менің бақытым онымен байланысты болмайды», – дейді Лаура Меси.
Некелесудің бұл формасы Италияда заңды түрде бекітілмеген. Сол себепті Меси формальді түрде бойдақ болып есептеледі.
2016 жылы қазан айында Эстония тұрғыны Кристал Ра Лаксми да өзіне өзі тұрмысқа шығып, 21 адамды қонаққа шақырған болатын. Сондай-ақ ол нағыз ер азаматқа тұрмысқа шығуды жоспарлап, өзімен өзі үйленуді соған дайындық деп есептеген.