Қазақстанда жылжымайтын мүліктің техникалық төлқұжатын рәсімдеу үшін бұрын Халыққа қызмет көрсету орталығына кемінде үш рет баратынсыз. Енді заңдағы өзгеріске сәйкес, аталған мекемеге бір рет бас сұқсаңыз болғаны.
Бұл туралы ҚР Премьер министрінің ресми сайтында хабарланды.
«Азаматтарға арналған үкімет» мемлекеттік корпорациясы» коммерциялық емес АҚ басқарма төрағасының орынбасары Медет Құмарғалиевтің айтуынша, деректердің өзгерістерін тіркеуге 2 факті – қайта өлшеу кезінде анықталған алаңның өзгерісі және жылжымайтын мүлік нысанын қайта жоспарлаған жағдайдағы сәйкестендіру сипаттамаларының өзгерісі негіз болуы мүмкін.
Жылжымайтын мүлік қайта жобаланған немесе қайта жабдықталған жағдайда, азамат жылжымайтын мүлік нысанының сәйкестендіру сипаттамаларының өзгерістерін тіркетуі қажет. Ол үшін алдымен өзгерістерді заңдастыру үшін сәулет органдарына жүгіну керек, нәтижесінде ол пайдалануға қабылдау актісін алады.
Бірақ, Медет Құмарғалиевтің айтуынша, енді барлық құжаттар топтамасын мемлекеттік корпорация қызметкері жинап бере алады. Ол сенімхат негізінде өз бетінше барлық құжаттар топтамасын жинақтайды, оның ішінде пайдалануға арналған қабылдау актісін де рәсімдейді. Ал қызметке жүгінуші Халыққа қызмет көрсету орталығынан тек дайын құжатты алады.
Айта кету керек, құжаттар топтамасын жинақтау қызметін мемлекеттік корпорация қызметкерлері ақылы негізде жүзеге асырады.