Грекияның Қарулы күштері ұшақтың сынықтарын тапқанын нақтылады. Ассошиэйтед Пресс агенттігі қорғаныс саласындағы дерек көзге сілтеме жасай отырып, іздестіру жұмыстарын жүргізіп жатқан грек билігі „радардан ұшақтың жоғалған жердің оңтүстік-шығысына қарай аумағындағы теңіз бетінен екі затты байқаған„ деп хабарлайды.
Естеріңізде болса, 19 мамырда таңертең Парижден Каирге бет алған EgyptAir ұшағы Мысыр жағалауынан 280 шақырым жерде жоғалып кеткен еді. Әуе кемесінің бортында 66 адам болған. Олардың басым бөлігі – мысырлықтар мен француздар.
Кеше кешкісін Елбасы Нұрсұлтан Назарбаев Мысыр президенті мен Франция президентіне Қазақстан халқы мен өз атынан көңіл айту хаттарын жолдаған болатын.