Жақып Асанов өзіне тиесілі жәрдемақы барын білмейтін жандар бар екенін айтты
ҚР Бас прокуроры Жақып Асанов Ақтөбе облысының 40 мыңнан астам тұрғыны әлеуметтік қолдауға ие болғанын мәлімдеді.
Бұл туралы ҚР Бас прокурорының баспасөз қызметі хабарлады.
– Әлеуметтік қамту бойынша 46 мың адамды қабылдадық. 4,6 мың адамға нақты көмек көрсетілді. Ақтөбеде республикамыздағы алғашқылардың бірі болып ауыл әкімдері үшін деректер базасын іске қостық. Онда әрбір тұрғын туралы, қандай әлеуметтік көмек алатыны, отбасында мүгедектер бар ма, мемлекеттің көмегі қажет пе, сол жөніндегі ақпарат болады. Әкім отбасының әл-ауқатының деңгейі туралы ақпаратты білетін болады және қажет болған жағдайда шаралар қолданады. Бұл болашақта бір де бір мұқтаж жан мемлекет назарынсыз қалмайды деген сөз, – деді ол Елбасының тапсырмасымен Ақтөбе өңіріне барған 200-ден аса маманның жұмысын қорыта келе.
– Тұрғылықты жері бойынша 502 мүгедекке бардық, олардың 136-сы көмек алды. Мысалы, 44 мүгедекке протез бен арба-кресломен көмектестік. Аз қамтылған және көп балалы отбасылардан шыққан 6,5 мыңға жуық азаматқа әлеуметтік атаулы көмектің тәртібін түсіндірдік. Ембі қаласының тұрғынына дәл үйінде мүгедектік рәсімдеген жағдай болды.
Көп жағдайда халық оларға мемлекеттен жәрдемақы мен төлемдер тиесілі екендігін білмейді. Көп балалы анаға 4 баласына және аз қамтылған отбасы ретінде 11 000 теңге мөлшеріндегі ай сайынғы жәрдемақы рәсімдедік. Ол бұл құқықтарын ешқашан білмеген және бұндай төлемдер аламын деп ойламаған да,
– деді Жақып Асанов
Бұдан тыс ҚР Бас прокурорының басшылығымен 5 ауданда бос жұмыс орындар жәрмеңкесі өткізілген. Онда жұмыс іздеп келген 701 адамның, 123-і жұмыспен қамтылған. Еңбекақы төлемеген 153 кәсіпорын басшыларымен мамандар кездесіп, мәселені талқылаған. Соның нәтижесінде жалпы сомасы 9 млн теңге берешек жалақы 232 жұмысшыға берілген.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе