Әзербайжанда Түркияда өткен айда болған мемлекеттік төңкеріс жасау әрекетіне қатысты күдікпен оппозицияшыл саясаткер Фаиг Амиров қамалды.
Бұл туралы Азаттық хабарлайды.
Баку соты 22 тамызда оппозицияшыл Әзербайжан халықтық майданы партиясының мүшесі Фаиг Амировты “діни алауыздықты қоздырды” деген айыппен үш айға қамады. Құқық органдары Амировтан АҚШ-та тұратын дін қайраткері, Анкара Түркияда сәтсіздікке ұшыраған мемлекеттік төңкерісті ұйымдастырды деп айыптайтын Фетхуллах Гүленнің кітаптары табылды дейді.
Амировтың адвокаты оған қарсы айыпты “сандырақ” деп атайды. Адвокаттың сөзінше, Гүленнің кітаптарында ешқандай үгіт-насихат жоқ және ол әдебиеттерге Әзербайжанда тыйым салынбаған.
Баку Анкарамен тығыз байланыс орнатқан. Түркияда бүлік басылған соң Әзербайжан билігі Түркия президенті Режеп Тайып Ердоған жағына шығып кетті.