Оның басты құрбаны – жаңадан танысқан жас қыздар болып келеді.Бұл туралы Алматы қаласы ішкі істер департаментінің баспасөз қызметі хабарлады.
Қаладағы Әуезов аудандық ішкі істер басқармасы хабарлағандай, Жахангер Құдайбергенов 32-жастағы қазақстандық Ұлықбек Садықовтың атынан әрекет еткен. Ер адам көбінесе алаяқтық әрекеттерге барған. Ол, негізінен жас қыздармен өзін Ұлықбекпін деп таныстырған.
«Күдіктінің алаяқтық әрекеттерін нақтырақ сипаттар болсақ, көп жағдайда ол жаңадан танысқан жас қыздарды алдаған. Мәселен, қыздың жұмысына келіп, ұялы телефонын қуаттандырып алуды өтінеді. Сосын біраз уақыттан соң әлгі қыздан бір жерге хабарласу үшін ұялы телефонын сұрап алып, далаға шығып қашып кетіп отырған. Ал тоқ көзінде қалған оның ұялы телефоны ұрланған телефоннан әлдеқайда арзан болады.
Бүгінгі күнге дейін біз алаяқтың осындай жолмен жасаған 6 қылмысын анықтадық. Одан да басқа жедел және арнайы шаралар барысында қылмыскердің екі ұрлық жасағаны да белгілі болды. Оның біреуі – пәтер тонау. Тергеу көрсеткендей, ер адам біздің елімізге заңсыз жолмен келген Өзбекстан Республикасының азаматы болып шықты»,- деп хабарлады Әуезов аудандық ІІБ бастығының бірінші орынбасары полиция полковнигі Құмарбек Кеншінбаев.
Өзбекстан азаматынан зардап шеккендер болса мына байланыс телефондарына дереу хабарласуларын сұраймыз: 298-53-00; 298-53-01; 298-53-02 немесе 102.