Қырғыз депутаты Ресей азаматтығын алғаны үшін мандаттан айырылды

24 просмотров

Қырғыз Республикасы Орталық сайлау комиссиясы 2015 жылы депутат болып сайланған Жыргалбек Саматовты қос азаматтығы болғанына үшін парламент қатарынан шығарып тастады.

Бұл туралы centralasian.org хабарлайды.

Жыргалбек Саматов 2015 жылы парламенттің алтыншы шақырылымына сайланған еді. Сол кезде-ақ «Республика-Ата-Жұрт» фракциясы оны Ресей азаматтығын алғаны үшін мандаттан айыруға тырысқан, бірақ Саматов депутаттығын Жоғарғы сот арқылы қайтарып алған болатын. Өйткені ол Ресей азаматтығынан бас тартқанын мәлімдеген.

Алайда Саматовтың Ресей азаматтығынан шыққаны туралы құжатты өзі әкеп тапсырғаны күмән туғызған. Сөйтіп тексере келгенде, ресейлік құзырлы органдар мұндай құжаттың Саматовқа берілгенін растай алмаған.

Орталық сайлау комиссиясының жиналысына қатысқан Жыргалбек Саматов бұл мәліметтерді жоққа шығарып, Ресей азаматтығын ешқашан алмағанын дәлелдеуге тырысты. Жиналыста қарастырылған құжаттарды ол жалған деп атады. Саматовтың уәжіне қарамастан, Қырғыз республикасының орталық сайлау комиссиясы оны Жогорку Кенеш депутаты мандатынан айыру туралы шешімін бірауыздан қабылдады.

Загрузка...