Рио-де-Жанейродағы Ойындардың ақтық бәсекесінде қазақстандық Василий Левитті жеңген бокстан олимпиада чемпионы Евгений Тищенко кәсіби рингте онымен тағы жүздесу мүмкіндігін жоққа шығармайды.
Бұл туралы боксшы Ресейге оралған шағында әуежайда журналистерге айтты, деп жазды sports.kz.
Рио төрінде 91-ге дейінгі салмақ дәрежесінде Тищенко Левитті 3-0 есебімен ұтқан еді. Алайда төрешілердің бұл шешімімен көпшілік келіспеді. Залдағы жанкүйерлер ысқырып, ұзаққа дейін назаралық белгісін білдіріп, Тищенконың әбден дегбірін қашырып еді. Одан кейін халықаралық басылымдар мен кәсіби бокс саласының мамандары да бұл жекпе-жектің әділетсіз болғандығын айтып, наразылық танытқан.
«Қазір маған демалу қажет, бірақ мен мұның болуы мүмкін деген ойдамын. Мен бұл жекпе-жектің өтуін қалаймын»,-деді Тищенко.