Таразда вокзал маңында жарылыс болды

167 просмотров

Тараз қаласының автобус вокзалы сыртындағы сауда алаңқайында жарылыс болды.
Фасфуд сататын дүңгіршекте газ баллоны жарылып, өрт шықты. Салдарынан екі сатушыны күйік шалды. Екеуінің жағдайы да өте ауыр.

Төтенше оқиға бүгін таңертең орын алды. Зардап шеккендер 90 пайыз дене күйігімен ауыр халде ауруханаға жеткізілді.

„Таңғы сағат 05:07 уақытында автобус вокзалы маңында жарылыс болып, фасфуд контейнері өртке оранды. Ондағы газ баллонында ақау бар болған боп шықты. Өрт сағат 05:23 уақытына дейін толықтай ауыздықталды. Оның себебі мен келген шығын көлемі анықталып жатыр„ делінеді Жамбыл облысы Төтенше жағдайлар департаментінің баспасөз қызметі таратқан хабарламада.

Жарылыс болған кезде фасфуд дүңгіршегінде 1990 және 1998 жылғы бойжеткендер болған. Екеуі де №2 қалалық аурухананың күйік шалу бөліміне жеткізілді. Екеуі де жан сақтау бөлімінде жатыр.

Алматыда 10 мамырда «Юбилейный» сауда үйінде де газ баллоны кесірінен жарылыс болды. Ол кезде тілсіз жау 1 100 шаршы метрді жалмады. Төтенше жағдайлар департаменті 7 адамды аман алып қалды. Сауда дүкені орналасқан тұрғын үйдің 120 тұрғыны сыртқа шығарылды, оның ішінде балалар да бар.

Загрузка...