Белгілі актриса Гүлнәз Жоланова түсірілім кезінде қалай аттан құлап, жарақат алғанын айтып берді.
Бұл туралы актриса comode.kz сайты жазды.
Қазақ көрермендеріне «Махаббатым жүрегімде», «Құстар әні» секілді кинокартиналар арқылы танымал болған Гүлнәз Жоланова биыл бірден бірнеше жобаларға қатысты. Ол «Бизнес по-казахски», «Тараз» секілді фильмдеріне түсіп бола сала, режиссер Жасұлан Пошановтың “Қашқарға саяхат” атты фильмінің кезекті түсіріліміне кірісіп кетті. Актрисаның айтуынша, бұл оның өміріндегі ең күрделі картиналардың бірі болған.
Мұнымен қоймай, актриса барлық трюктарды өзі ойнағанын жеткізді. Соның арқасында ол аттан да құлап, жарақат та алған көрінеді. Жарақаттардан кейін Гүлнәз тіпті үш күн бойы бойы тұра алмай жатып қалған.
«Ат деген ойыншық емес екен. Одан басқа түсірілім жаздың ыстық күндері болды. Ал біздің үстімізде қабат-қабат киім, қолымызда ауыр қару-жарақ. Соның барымен не аттың үстінде шабасың, не шайқасасың, не болмаса екеуін де қатар жасайсың. Ол аз болғандай Іле жағасындағы шыбын-шіркей әбден мазамызды қашырды. Менің актерлік тәжірибемдегі ең қиын түсірілім осы шығар», – деп бөлісті әсерлерімен актриса.
Актрисаның хабарлауынша, аталған кинокартина тарихи болмақ. Себебі, ол Шоқан Уәлиханов және оның Қашқар еліне жасаған саяхаты жайында түсіріледі. Киноның сценариі 22 жастағы Шоқанның тыңшы ретінде Қашқарға барып қайтқан сапары бойынша өрбиді. Бұл тұста Гүлнәз Шоқан Уәлихановтың сүйіктісі – қыпшақ қызы Ажардың рөлін сомдайды. Танымал актриса түсірілім кезінде аттан құлап, жарақат алған.