Алматы облысының Талғар қаласындағы «Тау Тұран» оқу-сауықтыру орталығының базасында Ғазиз Байтасов атындағы жас жол қозғалысы инспекторларының республикалық слеті өтіп жатыр.
Оған Қазақстанның өңірлерінде жеңімпаз атанған командалар, сондай-ақ Ресей Федерациясы мен Қырғыз Республикасының өкілдерінен құралған барлығы 160 оқушы қатысуда деп мәлім етті ҚР Ішкі істер министрлігінің баспасөз қызметі.
Слет бағдарламасында 10 номинация бойынша мынадай байқаулар қамтылған: саптық қарау, жас реттеуші, жол қозғалысы ережесінің білгірі, жас санитарлар, эрудиттер турнирі, үгіт-бригадалар байқауы, «Менің жасағым» таныстыру конкурсы, велосипедті мәнерлеп айдау, велосипедті автоқалашықта айдау.
Сонымен қатар, слет барысында жергілікті полиция қызметкерлерінің арасында «Үздік үгітші» байқауы өтеді. Байқауда қызметкерлер жол қозғалысы ережелері бойынша білім деңгейлерін көрсетіп, автокөлікті мәнерлеп айдау, жол-көлік оқиғалары кезінде алғашқы көмек көрсету бағытында бақ сынайды. Білім беру саласының қызметкерлері арасында да «Ашық үзіліс» конкурсы өтеді.
Слеттің жабылу салтанаты 25 тамызға жоспарланған, онда слет жеңімпаздары марапатталады.
Слетке «Халық қаһарманы» Ғазиз Байтасовтың есімі берілген. Ол – Жамбыл облысы ішкі істер департаментінің жол полициясы басқармасының взвод командирі, террористің гранатасын кеудесімен жауып, ондаған адамды өлімнен арашалап қалған батыр.