Қазақстанда азаптау туралы жүздеген қылмыстық істердің тек бірнешеуі ғана сотқа жетеді.
Бұл туралы қоғамдық кеңестің басшысы Марат Қоғамов қылмыстық-атқару жүйесінде азаптауларға қарсы тұру мәселелері бойынша қоғамдық тыңдау кезінде мәлім етті деп хабарлайды Қазақстан Жаңалықтары.
“Өткен жылы қылмыстық тергеу органдарының өндірісінде азаптау деректері бойынша 640 қылмыстық іс болды. Сотқа оның тек 13-і ғана жетті, оның өзінде бұл бас прокуратураның арнайы департаментінің арқасында жүзеге асты. Егер бұл көрсеткішті биылғы жылмен салыстырып қарасақ, азаптау туралы 350 қылмыстық іс болды, сотқа тек 4-еуі ғана жетті”, — деп хабарлады Марат Қоғамов.
Еске сала кетелік, бүгін Астанада ҚР Ішкі істер министрлігінде «Ішкі істер органдары қылмыстық-атқару жүйесінде азаптауға қарсы іс-қимыл» тақырыбында қоғамдық тыңдау өтті. Жиында министрлік өкілі дзюдодан Қазақстан чемпионы Бақытжан Әбдікәрімовтың өліміне түрмеде отырған азаматтар мен полиция қызметкерлерінің ұрып-соғып, қысым көрсетуі ықпал еткенін мәлімдеді.