Түркияның экс-премьері Ахмет Давутоғлу Ресейдің Су-24 ұшағын атып түсіруге бұйрық бергенін мойындады. Екі елдің арасына іріткі салған бұл жайт 2015 жылдың 24 қарашасында орын алған еді.
Алайда ол тура сол ұшақты емес, Түркия әуе кеңістігіне рұқсатсыз енген кез келген ұшақты атуға бұйрық бергенін баса айтты деп хабарлайды Hurriyet Daily News басылымына сілтеме жасап, Vesti.ru.
– Ресей ұшағы да әуе кеңістігін бұзды, оған бірнеше мәрте ескерту берілді, содан кейін әскерилер бұйрыққа сәйкес әрекет қылды, – дейді ол.
Алайда, Ресей Қорғаныс министрлігі ұшақтарының Сирия аспанында ұшқанына дәлелдер келтіріп, түркиялық тараптың жала жауып отырғанын айтады.
Айта кету керек, 16 шілде күнгі Түркиядағы төңкерістен кейін тұтқынға алынғандар арасында Ресейдің Су-24 ұшағын атып құлатқан ұшқыштың да бар екені хабарланды.